کیم نه ایستیر، من ایگزوز

گؤنلر بیر بیر اؤتورلر، گؤزووو آچیب یومورسان، ایل دؤنور. هاردا قالسین بیر ایکی گؤن، آدام یوخونودا دؤیونجا گؤره بیلمیر. اینسانین یئر اوزونده الی چاتمایان شی لره یوخودا ال تاپا بیلیر، یوخودا اولسا شیرین اولور. یوخونوندا بیر پیس لیگی وار اودا بوکی هم تئز بیتیر هم ده هر بیر ایتیفاق اونو پوزا بیلیر. پوزاندان سونرا نه قدر چالیشیرسان یادیووا سالاسان داها دوشمور، دوشسه ده آزاراق یاددا قالیر.

دان یئلی سؤکولمه کده یدی، سازاغین سویوغو یورقاندان ائشیکده قالمیش اوزومه چیرپیردی، بیر گیزیلتی بدنیمه چؤکدو یورقانی باشیما چکیدیم بؤزوشدوم بیر یئره. سازاخ اؤز ایشین گؤرموشدو منیم یوخوم قاچمیشدی، یؤرقونلوقدا ائلییه بیلمیردی یوخونو قایتارا.

هاوانین دورولوغو اینسانی فرحلندیریردی، یورقانی آیاقلاریم لا بیر قیراغا ووروب یئریمده اویان بویانا قه ینه شدیم، سینه گریب اللریمی سینه مه دؤیوب یئریمدن قالخدیم، یان یؤوره ده گؤز ایشله یه نه تک، آغاجی دی بیتگی دی، اینسان آثاریندان تکجه من ایدیم بیرده بیر دست یورقان دؤشک، حیس باسمیش بیر چایدان، بیر پیچاق، ایکی لووان دا واری ایدی.

   یاخینلاردان قوش سسی گلیردی، سسه قولاق آسدیقدا سسه دوغرو آددیم لاییردیم، آددیم لاریمی، سس سیز گؤتوروب قویوردوم بلکه قوشلار دیسکینیب قاچمایا لار، گئتدیکده اؤنوم ده بیر گؤل اؤزه چارپدی، بو گؤل کیچیک گؤل آنجاق چوخ دورودور، گؤلون اؤزونده رنگلی اؤرده کلر واریدی، اونلار اوخویوردولار، اؤرده کلرین رنگی، سویون دورولوغو، هاوانین آلا توران لیقی، اؤزل بیر دوروم یاراتمیشدی،

سویون دورولوغو هوسلندیریردی سویا جوموب اؤزمه یه، قوشلارین اوخوماسی هوسلندیردی طبیعت له بیرلشیب اؤز یئرینده اؤتوروب دبرمه مه یه، رنگلرین ترکیبین ده ایسته میردیم بیر بیرینه وورام، ائله اونا گؤرهده یئریمی برکیت مه یه چالیشدیم، اوردا دوروب باخام. هوسلنسم ده اؤزمه یه دؤزه م، هاوا قیزا اوندان سونرا اوزه م. ائله بو فیکیرده ایدیم کی حیس ائله دیم سو منیم آیاقلاریمین آلتینا دک زینه وئریب گلیب، بیرده ن، آیاقلاریم بوشا گئتدی،منه بیر خوش حیس ال وئردی، دئدیم ائله بوردا یئریم دن ترپنمه دن سویا دا گیره بیله رم، آیاغیمی آتدیقدا ، آلتی بوشا گئتدی، بیردن ائله بیل بیر سوبا بوروندان توستو بوغازیما دولدو، خفه لندیم، اؤسگوتمه ماجال وئرمه دی، گؤزومو آچدیقدا اؤزومو ماشین دا گؤردوم، بیر  اؤتوبوسون ایگزوزونون یانیندا، چیراق دا قیزاریب، سیگنال سسی هر یئری باسیب.