تورکجه‌نی نئجه اؤیرتمه‌لی‌ییک؟

   تورکجه‌نین رسمی اولاراق اؤیرنیلمه‌مه‌سی، اؤیرنمه‌یین چتینله‌دیر. اینسان اون‌ایکی یاشینا‌دک راحات اؤیره‌نیر. اون‌ایکی یاشدان آشاغی اوشاق‌لارین بئیین‌لرینده دیل‌لرین مرکزی تکمیل‌لشمه‌دیک‌لرینه گؤره، یئنی بیر سؤزلرین اؤیرنیلمه‌سی‌ آخاریندا اولور. اون‌ایکی‌یاشدان یوخاری یاواش-یاواش بئیین‌قورولوشو بوتؤو‌له‌شدی‌یینه گؤره اؤیرنمک چتین‌له‌شیر. بئله بیر اؤیرنمه‌یه، داها چوخ چابا گرک‌لی دیر.   

   گونئی‌‌آذربایجان‌دا تورک دیلینین، قورومسال اؤیره‌دیلمه سیستئمی اولمادیغینا گؤره، اینسان‌لارین چوخو بؤیوک‌یاشلی‌لیق‌دا دیلین یازی-پوزوسون اؤیره‌نیرلر. اؤیره‌دن‌لر‌ایسه، اؤزلری اؤیرندیک‌لری اوچون،  سیستئملی بیر ائییتیم آلا بیلمیرلر. هر کس دوشوب-چیخماق‌لا بیر سیرا باجاریق‌لاری قازانیر.   

 بو دورومو ده‌ییشه بیلمه‌‌ییمیزه  نئچه یول وار؛ اوچونو آشاغی‌دا گتیریره‌م:    

•  بیرینجی‌سی:  یان-یؤوره‌میزده اولان کیچیک‌یاشلی‌لارا تورکجه‌نی اؤیره‌دک.  
• ایکینجی‌سی: بؤیوک‌یاشلی‌لاردا، اؤیرنمه‌یی قات-قات آییرمالی‌‌ییق.  هر قاتین باجاریسینا گؤره ائییتیم وئرمه‌لی‌ییک.  
• اوچونجوسو: اؤیرتمن‌لرین اؤزلری تورکجه‌نی یاخشی اؤیرنمک‌له بیرگه دیلچی‌لیک‌له ده ایلگی‌له‌نسین‌لر.