دونیالیق آنا دیلی گونو، آنا دیلینی سئونلره قوتلو اولسون

   دونیالیق آنا دیلی گونونو، آنا دیلینی سئونلره قوتلو اولسون دئییرم. گؤره سن دونیادا، آنا دیللرینی سئومه ینلر ده وارمی!؟ بو سورغونون جاوابینی آلماق اوچون، دونیادا اولان هر بیر کسدن سوروشولمالی دیر.   

  دونیادا آنا دیلی، کیملر اوچون اؤنملی اولور گؤرَسن؟!. دیلی دونیا دیلینه چئوریلن اینگیلوساکسانلارا، یوخسا، دیللری ادبیات دیلی اولان فرانسیجالیلارا،  دیللری یئنی ادبیات دیلی اولان ایسپانلارا نئجه؟ دیللری فلسفه دیلی آدلانان آلمانلیلارا نئجه؟ دیللری سایماق ایستَمیرم.  

  بیر چوخ اینسانلار اوچون دیل دردی دئیه بیر شئی یوخ دیر. نییه کی دیللری، اونلارین ایستمکله ایسته مه مکلرینه باخمایاراق، اؤز یولونو تاپیب گئدیر.   

  دیل دردی، دیللرینه ایستَییب، اللری چاتمایانلار اوچون دیر. نییه درد اولدوغونو سوروشماق ایستَسز، جاوابلامایاجایام سیزی. بیلمیرم نئچه ایل دیر، دونیا آنا دیلی گونویله تانیشام. ائله بیل چوخداندیر. بو گونو آدلاندیرمادان دا اؤنجه، منیم اوچون هر گون بو گونودو. ایندی ایلده بیر یول بو گونو گؤزلویوروک.   

  دونیالیق آنا دیلی گونو آدلاندیرماقدان بیر چوخ زامان گئچمیر. 1999-جی ایلین نویامبر آیینین 17-سینده بو گونو آدلاندیرماق قرارینا گلمیشلر یونئسکودا.   

  بو گون، بیزه وورغولاندیقدا، ایلدن ایله سئودیییم دیل اوچون گؤردویوم ایشلری، گؤزدن گئچیریرم. ایل سایار اولوب، یازسایدیم، بلکه یاخشی اولاردی. ایل سایارا گرک قالمیر، اؤزومه زور وئریرم، بو دیلی اؤزوم اوچون اوخویوب، یازماقدان باشقا بیر ایش یادیما گلمیر. اوخویوب-یازیب-پوزدوقلاریمین زامانینی خاطیرلایاندا، تئلویزیون، اینتئرنئت، ایش، ائو، یوخو، قوناقلیق، دانیشیق، آل-وئر... قودوغوم واقتلار چوخ آزدی.   اوخوماقلا یازی-پوزولارا گلنده باشقا بیلدیییم بیر-ایکی دیلدن ده آز اولور. 

  اؤز-اؤزومه دئییرم گؤرَسن من دوغرودان آنا دیلیمی سئویرم بئله دیر. بلکه آنا دیلیمی سئومه یَم، اوندا نئجه اولاردی منیم دیلیم؟!

ایشین بیر باشین بوش توتماق!

   هر ایشده، ایشین بیر باشینی بوش توتساق، ایش اوزناالادیقدا، زورلانماریق. ایش تئز بیتدییی آن دا، بیتدییی یئردن باغلاییب، قورتاراریق. آنجاق بوش توتمادیقدا، ایشی بیر باشدان باشلاییب، سونونا یئتیرنده، قالانینی زورلا یئرلشدیرمه یه چالیشیب، ایشی آخسادیب، بیر واقتلار دا  ایش بیر یوللوق باتیراریق.

   هردن "ایشین بیر باشین بوش توت"-و قولاغیمیزا سیرقا ائله دییمیزده، بیر باشی بوش توتماق یئرینه، ایکی باشینی دا بوش توتاریق. ایکی باشی بوش توتولان ایشین سونونو سیز دئیین نئجه اولار. اوشاقلیق زامانین، ائوجیک-ائوجیک اویونلارینا اوخشایار، بیر فرقیله او دا بوکی؛ اوشاقلیقدا اوینانان ائوجیک-ائوجیک، تکجه واقت گئچیرمک اوچون اولماز. بؤیوکلری یانسیلاماق اوچون اولوب، گله جک اوچون اوینانار. آنجاق، بؤیوکلوکده ایکی باشی بوش اولان ایشلر، تکجه واقت گئچیرمکله، اؤزوموز قاندیرماق اوچون اولور. بوش توتماغی، ایکی قولاغیمیزا سانجماقلا، باشلاری بوش قویا بیلریک.

قیش، چیلله، بایرام آیی، بیزیم دیل

  بیلمیرم، هر بیر قیشین چیلله سیندن سونرا بیر یاز اولار یوخسا یوخ. گؤردویوموز دوغادا هر ایلی دؤرد یئره بؤلدویوموزده، ایلین سون فصلی قیش آدیلا باشلانیر. قیش بیر زامانلار قاتی اولماغینا باخمایاراق، ایندی یازکیمی اولور. بیز گؤردویوموز بیزدن اؤنجَکیلر، قیشلارین نئجه چتین قیش اولدوقلاریندان دانیشیردیلار. اونلار دا اؤزلریندن اؤنجَکیلردن ائشیتمیشدیلر. بیزدن سونراکیلار بیزدن قیشا گؤره سوروشدوقدا، گؤردوکلریمیزله ائشیتدیکلریمیزی دئمَیینه اینانیرام. ائشیدنلرین بوینونا دیر اینانیب-اینانمادیقلاری.  

   بایرام آیینا گلدیکده، قیش قیش اولور اولسون-اولمور اولماسین، بایرام آیی بایرام آیی دیر. دوغا دوغور بایرام اولور. بایرام، دوغانین بایراملیغیندان چیخیب، اینسانلارین بایرامینا چئوریلیر. بایرامدان بایراملار دوغولور. اینسانلار یاشادیقجا بایراملار یاشاییر. اینسانین اصلی بایرامی دیلین دوغولماغیمیش. دیل دوغولماسایدی، دوغا دوغاردی. آنجاق بایرام دوغولمازدی بیزیم اینسانلارا. هر دوغولان بیر جانلینین یازی اولور، قیشی اولور. قیشدان سونرا بایرام آیی اولور. دیلی جانلی وارلیق توتدوغوموزدا، قیشی-یازی اولمالی دیر. سون یوز ایل، بیزیم یئرین دیلی اولان تورک دیلینه قیش فصلی اولموش. چیلله سینه دولموش، کولَیه باسیلمیش. آنجاق اؤلمه میش. بایرام آیینی گؤزلویور، یاز اولسون دئیه، یئنه جانلانسین دئیه.

"آنامین یایلیغی" یاریشماسی نین بئشینجی دؤورونون چاغیریشی

      بئشینجی "آنامین یایلیغی" آدیندا یاریشمانین بیلدیریسی یاییلیب. آنامین یایلیغینی دوزنله ین یولداشلار، سانال دونیادان فایدالاناراق بیر بؤیوک ایشی باشلاییبلار. ایندی یه دک ده دؤرد یاریشمانی سونا چاتدیریبلار. بئله بیر ایشلرین، چتینلیکلرینه دایاناراق سوردورنلر، بیزه یول گؤستریجی اولوبلار. الیمیزده اولان آراجلاردان، گؤزل فورمادا فایدالانماق دیر.   

بئله بیر یاریشمانی یاخشی قارشیلایانلار دا چوخ اولوب دیر. آنامین یایلیغینداکی بوتون یولداشلارا یورولماسین دئییب، توتدوقلاری یولدا باشاریلار آرزیلاییرام. 

  بئشینجی یاریشمایا قاتیلماق اوچون آشاغیدا گلن لینکی تیخلایین.  

http://e-yayliq.blogfa.com/post-86.aspx

یازیم، یازماییم هاواسیندایام.

    یازیم، یازماییم هاواسیندایام. یازیب-یازماماق آراسیندا قالمامیشام ها، ایندیلیک ده بوردا یازیب-یازماماغی دوشونوردوم. ایشیم وار، باشیم شولوق دیر واقت قویماق ایسته میرم. یازیلار، تکجه یازماقلا بیتمیر. هر بیر یازی، یازیلدیغی آن باشلانیر یازی اولماغا. یازماق هاقیندا یازماق، بیزیم یازیچیلارین بوینونا دوشر( سؤزبازلارین سؤز چیخارتماغینا یئر آچدیم). البت اؤنمسه یینی ده اولور، اؤنمسه مه یینی ده. دوغروسو منیم دردیم تکجه یازماق دئییل. نئجه یازماق، ندن یازماق دا واردیر. یازیلارین ایچریلیک لرین آرتیراندا، هر نه اوردا باشلانیر. یازیلان هر بیر سطیر، دوشوندوره بیلر. دوشونجه بوشلوغوم وار دئیه س. هر یئردن باشلایاندا اورا چاتیرام. دوشونجه نین نه اولدوغونو تانیماق، دیرلندیره بیلمک، اؤلچولری تاپماق، تاپدیقلاریوی اورتایا قویوب تاپدالاماق، اؤزله اؤزگَنی آییرد ائله مک، دوشوننده قالیرام ایچیمده. منیم اوچون تعریفله نن اؤزون دیبینه چاتمادیغیم قدر یؤنو واردیر. هر یؤنون اؤزونده ده نئچه یؤن یئرلشیر. توت گئت، سونونا یئتیشمک اولمور، هئچ اولماسا من یئتیرنمیرم.   

   یازیم، یازماییم هاواسینا گلدیکده، ندنی اوسته کیلر دئییل. یئرسیز واقت باشیما گلمه سی دیر. ائله بوش واقتلاریم اولور، یادیما دوشمور، یادیما دوشنده ده بوینوما دوشور یازمی_یام. آنجاق، ایندی ترسه_سینه اولور