ایکی ایل اولور، ایبراهیم گیل دونیادان گئده-لی

پاییزین دؤردونجو گونو، جعفرزاده عاییله-سینین ایکینجی ایل دؤنومو دیر. ایبراهیم-گیلین یانیمیزدان آیریلماسینی اؤیرندیکده، هر قونودا دانیشا بیله-جه-ییمیز، هر چتینلیکده آرخالانا بیله-جه-ییمیز یولداشلارین آرامیزدا اولمادیقلاری، بیر ایل اولده چوخ قاباریق اولاراق، یاشامیما کؤلگه سالمیشدی. بو کؤلگه تکجه منه یوخ، بلکه اونلار ایله گل-گئت ائله-ییب یاخیندان ایلگی-له-نن هر کسه ایدی. ایلک گونلردن حرکتده بیر بؤیوک آخساقلیق دا یارانا بیله-جه-یینه اینانیردیم. ایبراهیم، اؤزو-اؤزونو گلیشدیریب، بوتون سیخینتیلارا باخمایاراق، یئریندن تئز داشلانمادان، گرکن آددیمی آتان بیری ایدی. بو اوزدن ده، اؤزونه اؤزل ایدی. هردن یولداشلار، بیر اولایا قارشیلیق، تله-سیک بیر ایش گؤرمک ایسته-ییب، ایبراهیمدان دا قاتیلماق ایسته-یه-نده، ایشین هر بؤیوتونو نظرده توتوب، قرار وئرَر ایدی. اونون دوشونجه-سینده قارشیلیق-لی ایشلره یئر یوخ ایدی. حرکتی بیر یؤنلو یوخ، بوتون یؤنلو دوشونوب، باشارا بیلدیگی قدر آتدیم آتاردی. حرکتده ایشله-نن هر حرکته قاتیلماسا دا، قینامازدی. حرکته گؤرولن هر بیر ایشی، ایشی گؤرنلرین اؤنمسه-دیکلرینی دوشونوب، خور باخماغا چالیشمازدی. چالیشمازدی هر کسی اؤزو ایسته-دیگی کیمی دَیَرلندیره، هر کسی اولدوغو کیمی دَیَرلندیریب، قبول ائلردی. بو اوزدن ده، بیزلر ایلگی قورا بیلمه-دییمیز کیمسه-لر ایله ایلگی قوروب، گره-کن ایش بیرلیگی ائله-ردی. کیمسه-نین هجمه-سینه قارشیلیق وئرمزدی. بیر زامانلار اولدو، حرکتین ایچینده گئچمیشده ایش-بیرلیک ائله-دیگی یولداشلارین هجمه-لرینه معروض قالدی. بیزلر، اونون یئرینه داشلانیردیق، آنجاق اونون تپگی-سی تکجه گولومسه-مه اولوردو. بو هجمه-لر تکجه شهرین ایچینده یوخ، بلکه آذربایجانین هر یئری ایله آذربایجاندان ائشیکده یاشایان( اؤرنک اوچون تورکیه) تورکچولرین آراسیندا دا اولوردو. بوتون ائشیتدیکلرینه تکجه گولومسه-دی. اونا قارا یاخانلارین یئری گلدیکده اللریندن توتوب، یئنی فیکیرداشلار ایله تانیشدیردی. بئله بیر داورانیش-لار ایله گون-گونه قارایاخمالارین قاباغینی اؤنله-ییب ایش-بیرلیگه یؤنلتدی. گئچمیشده-کیلری اونوتماغی باشاریب، گله-جه-یه یؤنه-لی آتدیملاری پلانلادی. آنجاق نه یازیق کی، عؤمورون پلانلاماسی اؤز الینده دئییل ایدی. اؤلومه گولومسه دیکده، اؤلوم اونو، اؤزو ایله آپاردی. ایبراهیمین یئری ایکی ایلدن سونرا داها چوخ بوش گؤرونور. اومودوموز وار ایدی، ایبراهیمی یاشاتماق اوچون، اونون آدینی سسلندیرمک ایله یوخ، بلکه دوشونجه-سی ایله داورانیشینی جانلاندیرماق ایله یولونو داواملاندیرماغا. آنجاق گئدن گئدیر، گئری-یه بیر ایز قالیر، یئرینی دولدورماغا اونون اوره-یینه تای گئنیش بیر اورک یئتیشه-نه قدر دؤزمه-لی اولوروق!

آد قویما چتینلیک-لری

   اوشاقلیقدا کیمین، منه آد قویدوغون، بیر ایکی دؤنه آنام گیلدن سوروشموشام. آنجاق، دوغرو دوزگون یادیمدا قالماییب. نسیللر دَییشدیکجه قویولان آدلار دا دَییشیلیرلر. بیر سیرا آدلار، گئچمیشده قالیرلار، بیر سیرا آدلار، آدلارین اؤنونه داشینیرلار. گئچمیش نسیلین اوشاقلاری چوخ اولدوغو اوچون، اؤنلرینه گلن آدی قویوردولار. قوهومدا، بیر آدی نئچه آدامدا گؤرمک اولور.

    بو گون، آذربایجانلیلارین ایچینده، ائولنمک یاشی اوتوزدان یوخاری-یا قالخیبدیر. اونونلا بیرگه تک اوشاقلیق دا، توپلومون ایچینده چوخ سئویلیر. بو اوزدن ده، توپلوم گئتدیکجه قوجالیر. بو ندنلره گؤره، سون ایللر ائولیلیکدن یانا اولوب، چوخ اوشاق سئون بیرینه چئوریلمیشم. بو چئوریلمه-یه آتا-بابالاریمیزین بیر یاخشی سؤزو وار؛ دالدان آتیلان داش، توپوغا ده-یر. ائولیلیکدن یانا اولدوغوما باخمایاراق، ائولنمه-ییم اوتوز یاشدان سونرا اولدو. ائولیلیک، ایکی کسدن اولوشدوغونا گؤره،  نئچه اوشاقلیق قالسین قیراقدا، بیر اوشاغین گلمه-یی بئله نئچه ایل چکیر! 

   سونوندا بیز ده آتا آنا اولا بیله-جکدیک. اوشاغین، آدی-بسی گلن گوندن، اونا نه آد قویاجاغیمیزین اوستونده دانیشیقلار گئدیردی. اوغلانلیغی ایله قیزلیغی بللی اولمایانا دک، قیز اوغلان آدلاردان بیر نئچه آدین اوستونده قرارا گلمیشدیک، آتاسی ایله آناسی اولاراق!  یولدا، اولانین قیز اولدوغو بللی اولاندان سونرا، قیز آدلاری، هردن بیر، اؤنوموزه سیرالانیردی. اؤنجه-دن بیر آدین اوستونده اورتاق یئره گلمیشدیک ساییلا بیلردی. آنجاق، یان-یؤوره ائشیدندن سونرا، منیم قراریمی ده-ییشدیردیلر. داها دوغروسو، ندنلرین سایدیقدا، آدی ده-ییشمه-یی خانیم ایله اورتایا قویدوم. او آدی، خانیم چوخ سئویردی. منیم اوچون ده، اویغون آد نظره گلیردی. آدین ده-ییشمه-یینه خانیمی راضیلاشدیرماقلا، یئنی آد سئچمه ماراتونو باشلادی. چوخ گؤزل تورکو آدلار وار ایدی. چوخ قویولان آدلاری ایسته-میردیک(بو ایستکده منیم پاییم چوخ دیر ساییلا بیلر!) اوشاغا قویاق، بیر-ایکی یاخشی آد قالیردی، اونلاری دا، یاخینلاردان اوشاقلاری اوچون قویموشدولار.  

  بیزه، یان-یؤوره ده اولان، یاخین-اوزاق کیمسه-لر، اوشاقلارینا آد  قویماق اوچون باش ووراردیلار. بیزیم ده الیمیزده، هر زامان  بیر بؤللو آد اولاردی. آدلار اوچون، یوروملاریمیز  بئله وار ایدی. اؤزوموزه گلدیکده،  آد سئچمه-ییمیز چتینلشدی. اوشاغین دوغوم واختی یاخینلاشدیقجا، بیر-ایکی آدین اوستونده دایانمیشدیک. سیجیللی آلماق اوچون، قویولا بیلن آدلارین لیسته-سی بیر دوشرگه-ده وار ایدی. سئچدیییمیز آدلارین، هئچ بیری اوردا یوخ ایدی. بو دا، او دئمک کی؛ او آدلاری آلماق او قدر ده راحات دئییل ایدی. 

   آدلارین بیرینین اوستونده قرار وئرمیشدیک. ایکیمیزین آراسیندا کسینلشدیردیکدن سونرا، یاواش-یاواش یاخینلاریمیزی ایله اورتایا قویوردوق. هر بیر آدی بَیه-نیب بَیه-نمه-ینلر اولور. ایلک الشدیرمه-لر یاخینلاردان گلیردی. دالدا-بوجاقدا آدی قویماماق اوچون، بیر سؤزلر دانیشیلیردی. بیر دؤنه قرارا گلدیییمیز آدی دَییشدیرمیشدیک، بو آدی دا یاخشی قانیتلاری اولسایدی، دَییشدیره بیلردیک، آنجاق ساده-جه بیر بَیَنیب، بَیَنمه-مه اولدوقدا، آدی دَییشدیرمه-یی دوشونموردوک. بو اوزدن، آدا قرار وئریلمیشدی. هر بیر قونو، اورتایا قویولدقدا، ان یاخشی یاناشما، چئشتلی آچیلاردان باخانلارین، قانیتلارینین اورتایا قویدوقلاری اولور. آنجاق، الشدیریلرین هئچ بیری، اوزوموزه دئییلمه-دیینه گؤره قانیتلاردان خبریمیز اولموردو. الشدیرنلر، الشدیرمه-لریندن چکیلمیردیلر، آنجاق بیزیم قرارلی اولدوغوموزو گؤردوکده، آدی چاغیرمایا باشلادیلار.  اوشاغین قولاغینا آد سسلندیکدن سونرا، 

  اوشاغین قولاغینا آدی سسلندیکدن سونرا، اوشاغا کیملیک بلگه-سینی  آلماق اوچون، سیجیللی ایداره-سینه گئتدیم. سیجیللی وئرن یئره گئتدیکده، بیر چوخ کیشی صف چکمیشدیلر. سوخولا-سوخول ایدی، ایچه-رییه گئچمک اوچون، سونوندا من ده سوخولوب، اوشاغا سیجیللی آلماق اوچون، اؤز  سیجیللیلریمیزی دوغوم بلگه-سی ایله بیرلیکده سیجیللی مأمورونا وئردیم. آد مأمورون قولاغینا تانیش دئییل ایدی. سوروشدو آدی دفترده وار، دفتری گؤتوردو باخدی. آد یوخ ایدی. بیر دیلکچه یازیب، اورا وئردیم، یئنی آد اوچون. نه قدر واخت آپاردیغینی سوروشدوغومدا، مأمورلارین دئدیکلرینه گؤره ییرمی گون چکردی.  

   ییرمی گوندن سونرا، گئتدیکده آدا جواز گلمه-میشدی. بیر نومره وئردیلر، نئجه اولدوغونو سوروشماق اوچون. بیر نئچه گون سونرا، زنگ آچدیم. زنگ چالیردی، کیمسه گؤتورموردو. دؤنه-لرله زنگ آچدیم، دئیه-سن کیمسه یوخ ایدی. بلکه ده نومره یانلیش ایدی. بیر داها گئتدیم، بو دؤنه دئدیلر، جاواب گلمه-ییب. گرک، گئدردیم دیلکچه-نین گئتدییی یئره. اورا دا گئتدیم. الیمدن اولان نومره ایله، دیلکچه-نین دالیسین توتدوم. دیلکچه-یه باخان اولمامیشدی! سیز بیلدیینیز، گؤرمزدن گلمیشدی دیلکچه-نی! سوروشساز عمد وار، کسینلیکله یوخ دئیه-رم. ایداره-لره ایشی دوشنلر، بئله بیر دوروملار ایله تانیش دیرلار. بیر داها دیلکچه ایسته-دی. آد بیر کومئسیوندا آراشدیریلاجاق ایدی. اوردا اوتوران خانیم، فارس اولدوغو اوچون، آدین نه آنلامدا اولدوغونو سوروشدو، من ده جاواب وئردیم. بئهزاد-بئهزادینین تورکجه-فارسجا سؤزلویو اوردا ایدی.

    اورانین ایشله-یه-نلریندن تورک اولان، بیر آغا ایله بیر خانیم وار ایدی. آغا، منه اؤیوت وئریردی "پئشمان اولاجاغین بیر آد قویما، سونرا دَییشذیرمه-یی چتین اولار" اؤرنه-یی ده "تؤکتم" آد ایدی، گویا بیری آلمیشدی، اوشاق بؤیویندن سونرا دَییشمک ایسته-میشدی( وابال دئیه-نین بوینونا) نه آنلامدا اولدوغون دا بیلمیردی.اوردا اولان تورک خانیمین تپگی-سی ایسه بو ایدی: "من ائشیتمه-میشم!" من اوردا اولالی، کومیسیونا گئدن دیلکچه-لرین چوخو، تورکو آدلار اوچون ایدی. "آنالی"-یا جواز وئرمه-میشدیلر.   

  اونلار دا بیر نومره وئردیلر،  بئش-آلتی گون سونرا زنگ آچیب، سونوجو سوروشماق اوچون. وئریلن واختدا سوروشدوقدا، جاواب یوخ ایدی. زنگ آچدیغیمدا، ائشیتدیم "هاکان" آدی اوچون ده جواز وئرمه-ییب-لر. بیر داها، زنگ آچدیغیمدا، سونوج دئیه-سن اولوملو ایمیش کیمی ایدی. گرک، دیلکچه-نین سونوجونو دوشرگه-یه گئچردیلر. صاباحی زنگ آچدیقدا، باشقا بیر خانیمین سونوجدان خبری یوخ ایدی، ایچیم-ایچیمی یئییردی. آنجاق، تئلفونلارین گؤتورولدویو قویموردو داها آرتیق سینیرله-نم. اؤته-سی گون زنگ آچدیغیمدا، خوش خبری وئردیلر. آدی قویا بیلردیک، آنجاق بیر گون داها دؤزمه-لی ایدیک. اللی گون دوزموشودوک بیر گون ده اوستونه!  دئیه-سن آدسیزلیغی، بیزیم اوشاقلار، بیر مودت یاشامالی ایدی. بیر سیرا آدلارین، نئجه یازیلیشینا پولچوک قوشوردولار، بیر سیرالاریندا آد دفترینده اولمادیغینا.  

  سیجیللی آلماغا گئتدیییمده، هله جاواب گلمه-ییب سؤزو، یئریمده دوندوردو. گئدیب-گلمکدن یورولموشدوم، بیر مأمورون یوخ دئدیینه، دالی چکیلن دئییلدیم. اونا گؤره، اوردان زنگ آچدیم، وئردیم مأمور خانیما، مأمور خانیم، بیر-ایکی ده-یقه نیققیلدادیقدان سونرا، تئلفونو آلیب، دانیشدی. قاش قاباغین تورشادیب دئدی. بیزیم سیستئمه گلمه-ییب، سالیق وئردی گئدم، آشاغی قاتداکی سیجیللی وئرن باجایا. اورا گئتدیییمده، آدین سون حرفینی ترسه ووردوقلاری اوچون، جوازین وئریلمه-دیینی بیر داها وورغولادیلار. آدی، گؤردویومده یانلیشلیقلارینی دوزلدیب، دوزونو یازدیم. آدی آلا بیلرسیز جاوابینی وئردیلر. اوردا، باشقا تورکو آدلاری ایسته-ینلره دیلکچه حاضیرلانیردی. شانسی-لار گتیرسه آلا بیله-جکدیلر، شانسیلاری گتیرمه-ییب، یاری یولدا یورولانلار، بیر داها آد سئچمه-لی اولاجاقدیلار. اؤزومه سؤز وئرمیشدیم، آدی آلانا دک دالیسین توتاجایدیم. هئچ کیمسه، آتا آنانی اوشاقلاری اوچون، آد قویماغین اؤنون الا بیلمز.

بونلارین هر بیری بیریانا، ایسته-دیییمیزین یئرینه یئتیریلمه-سی بو قدر چتینلیگه باخمایاراق بیر یانا! یامان دادی وار. 

بلاگ اسکایین ایچه-ری بیچیمی ده-ییشیب.

بلاگ اسکایین ایچه-ری بیچیمی ده-ییشدیگینه گؤره ائله-مک اولمور، یازیلان یازیلاری دوزنلی-یه بیلک. بوردا یازماق، قارانلیقدا یول گئتمه-یه بنزه-ییر. بوردا بیر یئره ده-یمه-نین اولمادیغینا باخمایاراق، قارانلیقدا یئریمک دویغوسو جانلانیر آدامدا. یئنی سطیرلر گؤزیومولو آیارلانمالی دیر. نئچه دؤنه بیر شئی-لر یازماغا باشلامیشام، دالیسین توتانمامیشام. دام-دووارا ده-یه-نلر کیمی ایره-لی-له-مک اولمور. بو قونودا یول بیلن یولداشلارین اؤنریلرین گؤزلویورم.

کیتاب سرگی-سی

  تورکجه کیتاب یایین ائولرینین بیر نئچه-سینی کیتاب سرگیسینه قویماغینی اؤیرندیگیمده، کیتاب سرگیسینه گئتمه-یه آیاغیم گلمیردی. اونون اوچون ده، کئچمیش ایللرده کی ماراغی ایتیرمیشدیم. آنجاق ایش یئرینده، لاتین کیتاب آلماق اوچون من ایله بیر باشقاسی، کیتاب سرگیسینه گئتدیک. بو ایل لاتین کیتابلارینین یئری، فارسی کیتابلاریندان آیریلمیشدی. عابباس آبادخیاوانین آلتیندا لاتین کیتابلاری، اوستونده فارسی کیتابلاری یئرلشدیریلمیشدی.   

   لاتین کیتابلاری اوچون،  دؤرد چادیر وورموشدولار. هارا گئده جه-ییمیز بللی ایدی. لاتین کیتابلاری، آلانلار قالسین قیراقدا، باخانلار بئله آز ایدی. کیتابلارین باها اولدوقلاری بیر دلیل اولا بیلردی. یایین ائولرینین بیر-ایکی سیندن سئوای، باشقا یایین ائولرینه میلچک قونموردو. ساتیجی-لار آلیجی-لاری گؤزدن گئچیریردیلر، آلان اولانلارا، هر یولو ساتماغا دَنیییردیلر. ایشیمیز بیر ساعات ایچینده بیتدیکدن سونرا، باشقا اؤلکه-لردن گلن یایین ائولرینه باش ووردوم. بیر ایکی آفریقایی اؤلکه، هیند، بیر-ایکی عرب اؤلکه-سی، تورکیه-دن ده قاتیلانلار وار ایدی. تورکیه-نین سیفارتیندن ده، تورکیه-نی تانیتماق اوچون گئچمیش ایل-لره تای بیرغورفه وار ایدی. هر ایله تای، او غورفه-ده اولان کیتابلار ساتیش اوچون دئییل ایدی. بو دؤنه ماراغیمی چکن بیر قونو وار ایدی. کوردلرین قونوسوندا بیر چوخ کیتاب وار ایدی. بو اؤزلویونده ماراقلی ایدی. کیتابلار کوردلر دانماق اوچون یوخ، بلکه تانیتماق اوچون ایدی. واقتیمین آز اولدوغو اوچون کیتابلارین هامیسینی واراقلایانمازدیم. واراقلادیقلاریم، کوردلر اوچون یئنی بیر یاناشمادان خبر وئریردی.  

  او سالوندا، تورکیه-دن گلن بیر یایین ائوی وار ایدی. غورفه-نین ایچینده کیمسه یوخ ایدی. یان غورفه-دن هاردا اولدوقلارینی سوروشدوم. دئدی گلرلر. بیر ایکی دؤنه باش ووراندان سونرا، ایکی نفر غورفه-یه گیردیلر. ائله بیل چوخدان ایدی بیر-بیرلرین گؤرمه-میشدیلر. کئف-احوال لاشمالاری قورتولان دئییلدی. سوروشدوم، تورکجه-تورکجه سؤزلوک-لری یوخ دیر؟ باشدان سووما کیمی دئدی باشقا سالونلاردا ایکی-اوچون یایین ائوی تورکیه-دن گلیب دیر. او سالوندان چیخیب، آدرس وئریلن سالونا گئتدیم. سالونا یاخینلاشدیقجا، افغانلی-لار چوخالیردیلار. افغانلی-لارین گنج اوشاقلاری، اؤنجه-دن گؤردویوم افغان گنج-لرینه اوخشامیردیلار. گئیینیشلری داورانیشلاری، تئهرانین غرب شهرکینده گؤردویوم تیپ-لردن چوخ پوست-مودرن ایدی. ائله بیلدیم بیر آن کابولون مرکزینده گزیرم.  تالیبان چوخدان ایدی دئیه-سن  اورالاردا باتمیشدی. تکجه تالیبان یوخ، اؤنجه-دن تانیدیغیم افغانلیلاردان خبر یوخ ایدی. بیر چوخ افغانلی اؤیرنجی-لری گؤرموشدوم. سالونا گیردییمده هر کیم وار ایدی افغانلی ایدی دئسم یالان دئمه-میشم. بیر چوخ مملکتلرین یوخلوغونو، دولدورموشدولار افغانلیلار. افغانلیلارین غورفه-لرینین قاباغی قالابالیق ایدی. یاخینلاشیب، کیتابلارینی دا باخماق اولموردو. افغانلیلارا عایید اولان غورفه-لرین ایچینده بیر غورفه ده "غزنی"غورفه-سی ایدی. غزنی، سولطان ماحمود غزنوینین شهری اولاراق، ایسلام دونیاسی-نین فرهنگی باش-کندی سئچیلیب دیر  بو ایل سانکی! افغانلیلارین غورفه-لرینده تئلویزیوندان دا گلیب فیلیم چکیردیلر. افغانلی-لارین دئدیک-لرینه گؤره اویدودا اولان شبکه-لرینده بیرینین خبرچی-سی خبر ییغیردی.   

  اورالاری سووشاندان سونرا، تورکیه-دن گلن ایکی یایین ائوینه باش ووردوم. نور ایله سمرقند یایین ائولرینده سؤزلوک، بیر ده تاپا بیلسم بیر تورک ادبیاتی تانیتیمی ایدی. نور یایین ائوینده 20 ایله 25 آراسیندا یاشدا، قاراشین بیر اوغلان دورموشدو. دانیشدیردیغدا تورکیه-لی اولمادیغی بللندی. بیلمیرم ساتیجی ایدی یوخسا یوخ، هر کیتابین اوستونه ال قویدوم، دئدیگی قیمت الیمی قوروتدو. رومانلار، اللی مین ایله یوز مین آراسیندا، قوتادغو بیلیک ایله، لوغات تورک دیوانی ایسه ی.زمین ایله ایکی یوز مین آراسیندایدی. آلماق ایسته-سه-یدیم ده آلا بیلمزدیم.   

  سمرقند یایین ائوی قالابالیق ایدی. اورانی دولاندیرانلار سانکی مذهبی مدرسه-نین گنج-لری ایدی. فارسی-نی اؤیرنمیشدیلر، غورفه-نین ایچینده ایکی-اوچ کیشی مذهبی کیتابلارا گؤره بیر-بیرلری ایله دانیشیردیلار. دانیشانلارین بیر تورکیه-لی، ایکی-سی افغانلی ایدی. اونلاردان سونرا بیر گنج اوغلان وار ایدی. سئیرک ساققالی ایدی، هله اوزو ساققالی ایله دولمامیشدی. او بیر ساتیجی ایدی. کیتابلارین قونولاری مذهب قونوساندایدی. ایستیردی نئجه اولمالیدی اولسون، بیر-ایکی کیتاب ساتا! کیتابلارین قیمتلری 10 مین ایله ییرمی مین آراسیندایدی، اوسته-لیک قلم، نوت کاغاذی دا وئریردی.   

  او سالوندان چیخدیقدان سونرا، ایشه قاییتماغی دوشونوردوم. افغانلی گنج اوشاقلا، چوخالمیشیلار. دانیشیقلاریندان، تئهرانین چئوره-سینده اوتوران عاییله-لرین اوشاقلاری ایدی. هئچ کیمدن چکینمیردیلر. باشلارین دیک توتوب یئرییییردیلر. سرگی-نین چیخیشیندا پارکینگه بنزر بیر یئر وار ایدی. قاپیسی آچیق ایدی. گنج اوشاقلارین چوخو گیریردیلر اورا، اونلارین گئتمه-یی منی اورا گئتمه-یه ماراقلاندیردی. هر کیم وار ایدی اوردا افغانلی ایدی. قیز-اوغلانلار کوما-کوما دایانیب میرتلاشیردیلار. بیر سیرالاری گؤزلرینین آلتیندان، بیر سیرالاری ایسه گؤزوموزون ایچینه باخاراق اؤزگه اولدوغوموزو اوزوموزه چکیردیلر. او دؤرد-دووارین بیر بوجاغی گئتدیکجه قالابالیقلاشیردی. اورا دوغرو آددیملادیق. الینده سیم-سیز بیر کیمسه دایانمیشدی. اوردا نه اولدوغونو سوروشدوق. افغانلی-لار اوچون بیر کونسئرت قورولاجاق ایدی. آنجاق ائله بیل بیر ساعات دئییلن واقتدان گئچمیشدی، هله باشلانمامیشدی. اوردان چیخدیقدا، کونسئرت قوروپون بیر قیراقدا گؤردوک. باخانلار ایله کونسئرت وئرن-لر بیر-بیرلرینه اویموردولار سانکی. افغانلی-لارین یئنی نسلی توولا ده-ییشمه-نی گؤرونتوله-میشدیلر.   

سئوگی قوشا بنزر، لایلارسان قونار، ایلگیلنمه سن اوچوب گئدر!

    سئوگیدن، هر گون یازیلیر. دونن بیری سیخیلان کیمی ایدی،  

سوروشدوم؛ "نَییندی؟  

- "هئچ دئدی" 

  او دیری باش بیری ایدی. هلم-هلم ایچریسین ائشییه تؤکمزدی. اونون هئچ دئمه یینه باخمایاراق،  حالیندان نئجه اولدوغو بللی ایدی.  

دئدیم؛ "دای گولمورسن، دولاشمیرسان، باش-باشا قویمورسان؟!"  ایستیردیم سؤزون باشین آچا. اونو بو گونه سالان اولای اولموشدو! نه اولدوغو منی ماراقلاندیریردی. نییارانچیلیغیم ایله مارقلانماغیم، الیمدن گلسه، الیندن توتماق ایدی. اونون اوچون ده، دئدیم: "دئمیرسن دئمه، آنجاق فیکر ائلیرسن الیمدن بیر ایش گله بیلر، دئگینن."  

  دؤنموشدوم گلیردیم، دئدی: "هئچ کیمین الیندن گلن بیر ایش دئییل، اورک ایشی دیر". دئدیینی اوندان ائشیتمزکیمی، "اورکدن دانیشارمیشسان دئمه لی! اورَیه اینانیرسان آخی، هاردا قالسین دانیشماغینا؟"  

  گولدو. "اولا بیلر، هئچ کیم ایله اورک آلیش وئریشیم اولمایا، آما منیم ده بیر اورَییم اولدوغونو یاددان چیخارما" کدرله-گولوش اوزونده بیرلَشرکرن دئییردی. بوندان آرتیق ایستَمیردیم ائشیدم. گؤیول قونوسوندان باشیم چیخمادیغی اوچون، یالنیش یؤنلندیرمَییم دئیه، سؤزون دالیسین توتمادان، دئدیم؛ "ایشیم وار" اوتاغیما دؤندیم.  

 اوتاغیما یئتیرمه میشدیم، منه سسلندی، "سؤزون باشین آچدین، سونونا دک، قولاغ آسمالیسان!".  

   دئدیم؛ "دوشوندوم اؤزل قونو اولدوغو اوچون ایلگیلنمه-ییمی بلکه ایستَمه-دین!". دوزون سوروشسانیز، بئله بیر قونولاردان چوخ قورخارام. بیز بیر یول قویاریق، یولون دوز ترسینی سئچرلر. اونلار اوچون سایغیلی اولساق، اورکلرینده ساخلاییب، واقتیندا اوزه چیخارارلار. سایغیلی اولماساق، ایلگیلری باشلانمادان، ایلگیلرینی دوزلتمک اوچون سنی خرجله-یرلر. اونون اوچون ده، بو قونولارا بولاشمایانلار، قولاقلاری دینج اولار.  

   دئدیم؛ "سؤزلریوی ائشیدَجه-یم، آنجاق بیر سؤز وئرمه-لیسن، کیم اولدوغونو دئمَییب، نارینلیقلارینا گئچمَیه سن!"  

  گولدو، "قورخما اؤزوم اوچون اولسا بئله، سؤزلرین چوخونو آتلییاجایام".   

  باشلامیشدی دانیشماغا: -بیلیرسن، ائولیلیگه، سئوگی-یه نئجه باخدیغیمی. یان-یؤورَمیزده بیر چوخ سئوگیلَنن-لر واردیر، وار ایدی. بئله بیر سؤزلردن دانیشان-لاری هر کسدن چوخ من اله سالاردیم. منیم ده بیرلریندن خوشوم گلردی، آنجاق سئودالانمازدیم. تکجه خوشوم گلمَده قالاردی. خوشوم گلنلردن بیرینی، تئز-تئز گؤرردیم. هر گؤردویومده ده، اونلا دانیشمادان، ایلگیلنمه دن سوووشمازدیم. یاواش-یاواش بو ایلگیبنمک-لره آلیشقانلیق تاپمیشدیم. ایشلریمی اونو گؤرمک ایله دوزنله-مه-یه باشلامیشدیم. ایکی-اوچ گون گؤرمَیَنده اونا داریخاردیم. بئله ایلگیلنمه-ییم البت قارشیلیقلی ایدی. هئچ اولماسا مندن بو دویغونو یاراتمیشدی. گولنده، گولوم آچیلیردی. سسی هر موسیقیدن چوخ، منی کئفلندیریردی. اونونلا دانیشیغیمدا داورانیشیمدا، حددن آرتیق گؤزلویوردوم. ایستَمیردیم، دئدیییم سؤزلر ایله گؤردویوم ایشلرین هئچ بیرینده اونا توخونان-لار اولا. ایلیشگیمیز ایرَلیلَمیشدی. گؤروشمَدن چیخیب، تئلفونلاشمایاجان چکیلمیشدی. خوشلوغو بوردایدی، هئچ کیم ایلگیمیزدن، هئچ نه بیلمیردی. البت، ایلگیمیزدن اؤزوموز ده هئچ نه بیلمیردیک. هر ندن دانیشیردیق، تکجه دانیشمادیغیمیز قونو، ایکیمیزه گؤره ایدی. سانکی ایکیمیز ده بئله بیر دوروما راضی ایدیق. اونو گؤرنده، اورَییم اؤزونده اولموردو. اورَییم دولو ووروردو. تئز-تئز ووروردو. اللریم تیترَییردی. باخیشلاری، گؤزومده یوخ، اورَییمده اوتوروردو.  هئچ کیم ایله پایلاشمیردیم. سن بیلن، سئودالانمیشدیم. سئودالانماق ایکی باشلی ایدی. آرامیزدا اولمایان تکجه شئی، جسارت ایدی. بیلمیردیم سئودا آغیللی-اوسلو داورانماغی گؤتورمز. دلی کیمی داورانمالی ایدیم. یا دا دلی کیمی داورانملی ایدیق. ایکیمیز ده آغیللی-اوسلو داورانماغی سئچمیشدیک. بئله بیر ایلیشگیمیزین باشلانماغیندان ایل یاریم گئچیردی. اؤزومو، سیناوا چَکیم دئیه، سئوگیم برکییب دئیه، ترسه داورانماغا باشلادیم. آغیر باش اولموشدوم. اورَییم ایسته-یینه باخماییب، گؤروشلریمیزی هفته-یه چاتدیرمیشدیم. تئلفونلارینا دا آغیر جاواب وئریردیم. آرامیزدا سئوگیلنمک قونوسو آچیلمادیغی اوچون، نییه بئله داورانمادیغیمی دا سوروشانمیردی. گئتدیکجه گؤروشلریمیزین آراسی چوخالمیشدی. ایکی هفته-دن بیر یولا چاتمیشدی. اورَییمین دویونتوسو قالیردی. گؤروشنده، بیر-بیریمیزه سؤز سالیردیق. سؤز سالمالار، باخیشلاریمیزین ائتگیسینی آلمیشدی. گؤیوللار قونشو یؤنلره اوچوردو. قونشودا ایشین بیلن بیر قوشباز، گؤیوللری لای-لایا بیلردی. قونشولار لای-لایانمادیلار. آنجاق سئوگیمیز اوچوب گئتمیشدی. سؤزون قیساسی، سئوگی قوشا بنزر، لایلارسان قونار، دنَین سویون وئرمَسن، اوچوب گئدر.  

  سؤزلری قورتولموشدو. آجی گولوردو. من ده هوروت-هوروت باخیردیم. دونیادان دانیشاندا آغیللی باشلی اولماغی وورغولایاردیق. اورکدن دانیشماغا سؤزوموز یوخ ایدی. دانیشب-قورتولوب اوتورموشدو. "من تانیدیغیم بیری ایدی گؤرَسن سئودالاندیغی قیز؟!" اؤز-اؤزومه دوشونوردوم. ایش یئریمیزده اولان قیزلاری بیر-بیر خاطیریمدن گئچیردیم. اونا یاراشدیرانمادیم بیرینی. ایش یئریمیزدن قیراقدا اورتاق تانیدیغیمیز قیزلار یوخ ایدی. ندن او قیزی آختاردیغیمی دا بیلمیردیم. ایش-بیرلرین بیری خبر گتیردی، "دئییرلر زاهیدان طرفینده بیر زلزله اولوب 5/7 ریشتئرده".