یاغین لارین فرقی

   بوگون ده یاغیش یاغیر، هاوانین قاش-قاباغی یئری سوپورور. یاغیش یاغدیغیندا دئیه سن یئنی دن نفس وئریر هر کسه، هر یئره، هر ائوه. یازین یاغیشینین دا باشقا دادی وار. یاشیللیق لاری اوزه چکیر. یاغیش یاغاندان نئچه گون سونرا هاوا آرینیر، نفس لر راحات گلیر گئدیر. نئچه گون یاغیش یاغاندان سونرا هاوا بیر داها خارابلاشیر آدام بئله نفس چکمه یه ده زورا دوشور.  

   تئهرانین یاغینی ایلا بیزیم طرفلرین یاغینلارینین چوخ فرقلی لیـیی وار، ایندی دئیه رم نئجه؟ 

  هر زامان تئهراندا یاغین  یاغاندان سونرا ائله بیل ماشینلاری باسیب سان بیر لیل لی، قارا سویون ایچینه، اونو تمیزلمه یه گرک گئده سن ماشین یویان یئره ماشینی یودوداسان. بیزیم طرفلرده لیلدن چوموردان خبر اولمور، یاغیندان سونرا ماشینلار ائله بیل کارواشا گئدیبلر، تکجه قورولاماق ایستیـییر.!   

ایندی ده بونون فیکرینده یم، ماشینی ساخلییام، بوتون یاغیش لار یاغاندان سونرا، اؤز یئرلریمیزه گئدن زامان یویوب چیخام.

یولداشیمین دایی سی

  کئچمیش گونلرده نئچه نفر سوبای،  بیر قالدیقدا بیر یولداشیمیز وارایدی لاپ ائو اوشاغی. شهرلرینده ایش تاپمادیغینا گؤره تئهرانا گلیب بیر دولتی ایداره ده ایشه باشلامیش دی. بیزیم  یولداشیمیزین تئهراندا قوهوم قبله سی وارایدی، کی هر دن بیرینه قوناق گئدردی. قوهوملاری دا خئیر-شرلرینده بیزی یانی یولداشیمیزین ائو بیرلرینی چاغیراردیلار. اونون 30 ایل باشی اوجالیقلا خیدمت ائله ین بیر نیظامی دایی سی وار ایدی. دایی نین ائوینده گئجه ساعات 8-ده شام یئییلب، ساعات 10-دا دا باشلار یئره آتیلیب  یاتیلاردی. یاتمامیشدان دا قاباق، ائوده تیلفون، تیلویزیون، آیفون سسلری کسیلیب باغلاناردیلار. یانی قوهوملارین دا ایشلری اولسایدی آغا دایینین قورخوسوندان صاباح صوبحه دک دؤزمه لیدیلر.  

  آغا دایی نین دا دونیادا ایکی قیزی وارایدی،  گؤزل، اردملی، باجاریقلی و بیرینجی گؤروشده ائلچی قازانان بیرلری. ائله بیر گون بو قوناقلیق لاردا بیزیمله قالیب سیننی  اؤتوشن یولداشلاریمیزدان بیری، قیزلاردان بیرینی بَیَنیب ایکی آیاغین بیر باشماغا تپیب، ائو اوشاغی یولداشیمیزدان دایی قیزیسینی ائلچی  لیک ائدیب،بو ایشین یئرینه اوتورماسیندا اونون کؤمَیینی ایسته دی. او اوشاغی یولداشیمیزدان بو سؤزو ائشیت دیـیینده رنگی قاچیب، اولمویاجاغینی سؤیله دی. دایی سینین بیلمه یینده هم قیزیزن، هم اوغلانین، هم ده اؤزونون اؤلمک لری گؤزلنیلمَیین  بیلیندیری. بیز ده نه قدر سؤز دئدیک قولاغینا گیرمه دی. تورشامیش یولدشیمیز بیر آیری قیزلا ائولنیب بیزدن آیریلدی. آنجاق ائو اوشاغی یولداشیمیزین دا سؤزلریندن بئله دوشوندوم اونون دا  دایی قیزیدا  گؤیلو وار. آمما بئله بیر سؤزون بیلینمه ییله اونلا دای قیزینین باشلارینین کسیلمک لری  گؤزو قاباغینا گلدیکده، هئچ زامان بئله بیر سؤزو دیله گتیرنمدی.  

هر باهانا ایلا دای یا بیر شئی آلیب وئریردی، البت بونو دا وورغولامالییام خان دایی اونا ایش تاپمیش دیر. قالدی قالدی سوزالیب سارالیب باشی آغاریب ساققاللاری تؤکولدو، دای قیزی سی دا ائو اوشاغینین خالااوغلوسولا ائولنیب گئتدی، او دا قالدی گؤزلرینی اووشدورا-اووشدورا!   

نییه کئچمیش یازیلارین فونتلاری قاریشیق اولور؟

گؤردویونوز کیمی کئچمیش یازیلاردا، بیر سطیرده اولان یازیلارین آراسیندا یئرسیز آرالار یارانیب، چیرکین لشیب، بونون ندنی یازیلاری WORD-دا یازیب، اوردان بورا  گتیریلمَیی دیر. نه قدر اَللشدیم اونلاری دوزنلییَـنمه دیم، سیزلردن بو چتینلیـیی نئجه پوزا بیلَجه ییمی بیلن اولسا یازسین، چوخ سئویندیرر. 

آیلی شهر

                                                  آیلی شهر   

قارانلیق یئتیشیب هر یئری بوروموشدو، یولدا اولان ماشین­لارین دا چیراق­لاری یاندیریلیب، قارشی­دان گلن سوروجولرین گؤزلرینه گیریب، دلیردی، سوروجولرین چوخلاری   چیراق­لارینی یوخاریـیا وورموش اولسایدیلار دا  قارشیدان گلن ماشین­لارا یئتینجه آشاغی­یا ائندیریردیلر، بیر سیرالاری دا تاپیلیردی یوخاریدا ساخلیـییب، اوز-اوزه گلن­­لری یولدان چیخاردیردیلار. یولون بوروق­لارین دا بو گؤزه سالماق­لار قورخولو اولوردو.

     یاندا اولان تابلو­لاردا، 35 کیلومئتر زنجانا قالماغی بیلندیریردیلر.  بوروغو دؤندوکده توپ کیمی ایشیق اوزاقدان گؤز ووردو. دئیه سن دنیزه قویولان فانارلار یوللارا دا قویولور. فانارین ایشیغی چیریلداسا، بو ایشیق باشقا بیر ایشیق اولمالی­دیر. دئدیم بلکه زنجانا دا قوندارما ایشیق قالاسی قوروب­لار. بو ایشیق دئیه­سن منی قارشیلادیق­دا ال-­آیاقدان گئدیر. تئز-تئز ساغدان سولا، سولدان ساغا کئچیر.  ایشیق ائله بیل قلمه آغاجلارینین باشینا ساپلانیب، آغاجلاری دا یئرده اولانلار جوشدوروردولار.

   گئتدیکجه ایشیق بویوب آغاجلارین چیگینیندن یئنیردی. او دئیه­سن بیر یئره باغلانمامیش­دی، نئجه دایاندیغینا فیکیر وئردیکده ایندیجه دوشدویون خاطیرلادیردی. قاباقدا گلن سوروجولر دئیه­سن پاخیللیق­لاری گلیردی، توپ ایشیغی گؤرمویوم دئیه آرابا ایشیق­لارینی یوخاریـیا قالدیریب، گؤزلریمه سالیردیلار. گؤزومو گؤیدن آلیب یولا سالدیق­دا ماشینین دره یوللانماغینی دویدوم. فرمانی بیر آز بوروب بیر داها یولا دؤندوم. باخیشلار یولدان قووزانمالی­دیلار، چوخدا یوخارییا قالدیرماق مجبورییتینده دئییلدیلر. ایشیق آیا بنزه­ییردی، آنجاق بو بویدا آیی، ایندیـیه­جن گؤرمه­ییم یادیما گلمیردی. بو آی بوتون آیی­دیر، دوورانلارین بوتونلشمیش آیی، زنجانا قوناق گلن­لری قارشیلییردی. آی، بالا-بالا داملارین اوستونه یئنیردی، نردیبان دا ایسته­مزدی اونو توتماغا. توتان ایستیـین اؤزو توتولاردی. شهر بوتونلوک­له آیا بورونموشدو. من ده آیا بورونمه­یی سئوردیم. آی بوتون آی، سوت کیمی آی، من ایسه آیسیز. نه قدر سوروب سووشماق ایسته­دیم اولمادی. دئیه سن قالمالی دیم آیلی شهرده.  

مین بئله بایرام­لار

مین بئله بایرام­لار

   وعده یئلین اسدیـیینی گؤره بیلمه­سم ده، اونون ائتگی­لرین شهرده گؤرمک اولاردی، گؤرنلر دئییردیلر یئل آغاج­لاری یئریندن چیخاردیردی. یئلدن سونرا هاوا قیزمیش ایمیش. هاوانین قیزماغی سوبالارین سؤندورولمه­سینه سبب اولموشدو. قاپ-باجا دا آچیلمیش دی، هاوانین قیزقینلیغی دا کئچمیش­دی، هاوا سویوق­لاشمیش­دی. گون اورتایا بیر ایکی ساعات قالاندان صاباح سحره دک نارین قار یاغدی، بیر دیللی قارین یاغماغی هر یئری آغ گئییندیریب بایرام هاواسی نی قیش هاواسینا دَییش­دیردی. ارکن گول آچمیش آغاج­لاری سویوق یاندیردی، قار، بویلانمیش آرپا بوغدالاری دا یئره سردی. هاوانین تئز قیزماغی آغاج­لاری آلداتمیش دی، آلدانانلار دا پای­لارینی آلدیلار. دوزون سوروشسان ائله بیز ده آلدانمیشدیق، اؤزوموزله ایستی پالتار گؤتورمه­میشدیک.

   قارلی سویوغا باخمایاراق بایرام قاپی­لاری دؤیوب اؤره­کلره یئرله­شیردی. هر کس اؤز دورومونا باخاراق بایرامی قارشیلاییردی. کئچمیشده بایرام گلدیکده هر ائوده یومورتا بویاناردی، ایندی ده هر کس اؤز ایسته­دیـیی، یادا یوخ یایین جاهازلاریندان آلدیق­لاری کیمی حاضیرلیق ائدیردی. ایندیکی زامان­لارین ایلگی­لنمه آلتلرین چئشیتلی اولدوغونا گؤره، دب­لر ده چئشیتلی­لنیب. هر کسین بیر جئب تیلفونو وار، ایسته­دیـیی آداملارا سؤز-ساوونو یوللویور. چوخ آدام دؤزور گلن مئساژلاری یوللویور، نئجه چیخدیغی دا وئجینه دئییل. بازاری آددیملادیق­دا بایرام سوفراسینا حاضیرلیق هر بیر شئی دن چوخ گؤزه چارپیردی. ایکی جانلی نین سوفرادا اولدوغو بازاری دا جانلاندیرمیش دی. سوت­امر گؤیرتی­لرله یئنی یئتمه بالیق­لار قیزاران بازاری یاشیللاتمیش­دیلار. باهارین نفسی اونلاردا چوخ دویولوردو. برکتلرین یئددیسین بیر مئساژ کیمی یاخشی بایراملیق اولا بیلردی کی اولدو.  بایرام آخشامی یومورتالاری بویویوب، یازماق­لا یئنی ایلین قارشیسی­نا گئتدیک. 30- قیرخ بویانمیش یومورتالاری یازماق یاخشی آنلاری هیزلی سووشدوروب، ایلین دؤنمه­یینی ده سووشدوردو. سولارین فیشارینین آزالماسی چوخلارینی حامامدا ساخلامیش­دی. تئلفونلار دا ایکی-اوچ ساعات قاریم قاریشیق ایدی، هر کسی توتوردون توتموردو، دئیه­سن هامی بیربیرین توتورموش، تئلفونلار دا گیجه­للندیک­لریندن هئچ کیمه یول وئرمیردیلر.

   بایرام گؤروشلری باشلاندیغیندان ائولره گئت-گللر آچیلدی، هر ائوی شوبه­لمک 10 دیقه چکیردی، الیمیزی ووردوق­دا بیر شیرنی، مئیوه، چای هئچ اولماسا ایکی-اوچ دنه آجیل آغیزدان ایچری گئدیردی. نه اولوردو

   ایکی-اوچ ائوی شوبه­له­مه­میش قارینلار قاریشیردیلار، زَفتین آلانلار دا بایرام چیخمامیش یا دونیالارین دَییشمه­لی­دیلر، یا دا قارین­لارین، دیش­لرین، دامارلارینداکی قان­لارین. دئیه سن هر کس آند ایچیب هر ائوه گیردیکده بیر شئی دادسین، آخی ایلده بیر دؤنه قوناق گئدیردی اونو دا بیر شئی دادماسایدیلار گؤر نه اولاردی!؟  بو آرا دا ناهار، شاما دا کی چاغیریلسایدین نه ائده بیلردین!؟

   یازدیغیمیز یومورتالار بتر ماراق چکیردیلر، هر کس گلدیک­ده ائله یازیلمیش یومورتالاردان بیرینی ساخلاماق اوچون گؤتوروردو، گؤتوردوکده ده یومورتانین نئجه و نیـیه بویاماغیندان سؤز گلیردی، برکتلرین یئددیسیندن سؤز آچیلیردی داها دا ماراق­لار چوخالیردی. هر ائوده برکتلرین یئددیسین سوفرالارا، نیـیه­لیـیین بیلمه­دن یئرلشدیریردیلر. آینا، بالیق، گؤی، یومورتا، آلما، پول، چؤرک هر ائوده اولوردو. چوخلاری تئلویزیوندان ائتگی­لندیک­لری اوچون قوندارما هفت­سین ده بازاردان آلیردیلار سوفرالارینین یانینا قویوردولار ، نه اوچون قویدوق­لارین دا سوروشدوق­دا بیلمیردیلر.

  اوشاق­لارین گؤزلرینده بایراملیق دیله­یین گؤرمک اولوردو، من ده چالیشیردیم یادیمدان چیخماسین.منده اولان بو گونکو گؤزلر یاش­لانیب ایشیق­لارین ایتیرسه­لر ده اوشاق­لیق هاواسیندان هله ده هاوالانیر لار. گله جک ده ده هاوالاناجاق­لار، گؤزلر تورپاغا دا گؤمولسه­لر هاوالاناجاق­لار بئله.

  یادیمدان چیخمامیش دئییم چوخ یئری آختاردیم؛ ازیک قیزیل پالچیق، بزه­نمیش ناخیشلی دووار آختاردیم تاپاندیم، سیز تاپساز منه یوللایین.

گلن گونلرینیز ده خئییرلی اولسون.

­