بایرام یولچولوغوم

بایرام یولو

یادینیزدا اولسا گئچن یازیلاردا دئمیشدیم ایلین آخیر چرشمبه­سی نی تئهراندا اولماق مجبوریـیتینده­یدیم، یادینیزدا اولماسا دا کئچن یازیلاردا چرشمبه یازیسینا باخین. دوزو چرشمبه نی سووب-سووشدورماز آذربایجانین گؤبه­یینه یوللاندیم. چوخ جان آتدیم گون­اورتا چاغی تئهراندان یوللانام، آنجاق دئیه سن او گون هر کس قورتولوب قاچماق ایسته­ییردی، ماشینلارین بوتون یوللاری باغلانمیش ایدی، یاریم ساعات­لیق یولو 2 ساعات اوزانلادی. ائوه یئتیریب چانتالاری ماشینا یوکلویوب بیر شئی آتیشدیریب یولا چیخمالیدیم. ائوده آروادین دا ییر-ییغیشیغی قورتولمامیشدی. آدام هر نه قدر تله­سه­نده داها چوخ یوبانیر. نئچه دؤنه­لر بئله اولموشدو. گون­اورتا چیخان اوغول، ساعات 4-ده آنجاق یوللاندی. خییاوانا چیخماغیمی گؤدوم دوز ایکی ساعات یاریم تئهراندان کرجین چیخیشینا سوردو، ماشین سورعته دوشمه­دن دایانیردی، دایانماق دا نه دئمک، بیر یوللوق دایانسایدی آدام سئوینردی، مجبورییت حالیندا بیر آیاغین تورموزدا بیری کیلاچدا اولمالیدی، ایکی آیاق دان بیری بوشالدیقدا گاز پئدالینا دا اپارا بیلردن، قاباغبنداکی ماشینین­دان یاریم مئتیر ده آرا توتدوغوندا ساغ­ سولدان دا او بیری ماشینلارین بورونلاری سنین یولووا سوخولوردو سن اوردان چیخینجا خئیلک چابالامالیدین. ائله بو سوخولماق­لاردان ماشینلار دیمدیک­له­شیب قضا تیرافیک­لری یارادیردیلار. بیردن ده گؤروردون پولیسین کئفی چکیب بیر طرفی دایاندیریردی. دوزون دئسن آدام لاب بیخیردی. بیخدیغیندان بیلمیردین کیمنن ساواشاسان، یا دا حیرسیوی بیرینه تؤکه­سن. آرواد به سنه دئمیشدیم هر نه حاضیر اولسون بیز چیخاق، گؤردون گئجیکدیردین ایندی بو جهنمدن قورتولماق اولمور. سن نه قدر دئیه  سن بیلیردین گوناه هئچ کسده دئییل­ایدی. بئله گونلر هر زامان بئله اولور. بیر قارا گونه دوشموشدوک گل گؤره­سن! آمما یاخچی­لیغی بوردایدی ایکی هفته­لیک تئهراندان اوزاقلاشاجایدیم، قارادان، توستودن خبر اولمایاجاق­دی، آمما ائله بیل تئهراندا هر کیم وار منه تای دوشونوردو، من ایسته­دیـییم زامانلار تئهراندان اوزاقلاشماق ایسته­ییردیلر. 2 ساعات یاریما تئهران­لا کرج آراسی­نی کئچمک زامان آپاردی. بیر آیاق تورموز بیر آیاق کیلاچدا اولماق هر نه گوج وارایدی الیمدن آلدی. سئوینج­له باشلادیغیم یوروش باشلانمادان یوروجو اولوردو، گؤزلریم یولو گؤرمه­یه آچیق قالانمیردی. دولدورولموش سئوینج کیلاج-تورموزلاردا جالانیب، دیبینده بیر شئی قالمامیش­دی. تازاشدان دولدورماق نئجه اولا بیلردی، آللاه بیلیردی. سئوینج اولمادان دا سوروجولوک چتین اولوردو. قزوینه یاخینلاشدیق­دا کیلاج-تورموزلار آزالمیش­دیلار. هر نه گوج­ایله ایدی یول گئتمک اولوردو. زنجانا یئتیشدیکده راهات نفس چکه بیلمه­ییمه باخمایاراق گؤزلرین آچیق­ قالماسینا گوونمک اولموردو. زنجاندا ایکی دوستا باش وورا بیلردیم. هر زامان زنجاندا اولماق منیم اوچون دادلی اولوبدور. بیلمیرم نه­یی وار! هر زامان هر یئردن چوخ منه دوغما اولوب، هر نه تانیش گلیر. بئله بیر دوغمالاشمیش یئرده تانیش تاپماق دا آساند اولار. ایستیرسیز دنه­یین!

بیر بالاجا دیل­اوجو بویورون قالین­دا منی زنجاندا ساخلاشدیرا بیلردی. ائله ده اولدو. گؤزلریمین آجیسین دا آلا بیلردیم. قارانلیق­دا سؤروجو لوک ائله­مک­دن ده قورتولا بیلردیم. هر نه یه بئله، یاخشی اولوردو. تانری محله­سینین یاشایانلارینین ساوچی­سی نین ایـیینی آلماق، قوخوسونو دادماق اله دوشمز آن­لار یارادیردی.یئرده اوزانماغیمی گؤردوم، گؤز آچدیق­دا دان سؤکولمک­دیدی، تام یولا چیخمالی زامان، گون چیخماغی آیدین گؤرمک اولوردو. سحرین یئلی ماشینا مینمه­دن یامان یاپیشیردی. بویوک یول داغلارین اورمانلیغینین آراسیندا کئچیر. اولا بیلردی بو یول چکیلمه­سه­یدی عومور بویو داغلارین اورمانلیغین گؤرمیـیه­یدیم. آنجاق بو یول چکیلدی منله بیرلیکده بو یولدان کئچن­لرین هامی­سی گؤردولر.یوللار داغلاریلا قالخیب یئنسه­ ده بوتون شهرلری قیراخدا قویور. تکجه تابلولاردا یازیلمیش آدلاردان بیلیرسن هانسی شهرین اوروشونده­ییک. ائله بیل تازا یول بوتون یول قیراغی شهرلدن کوسوب، بلکه ده کوسدورولوب. هر شهردن آزی 30 کیلومئتیر آراسی وار. چایلار دا بئله بیر ایش گؤرمورلر کی بو یول گؤروب. چایلار هئچ زامان اؤزلرینی آوادانلیق­لاردان اسیرگه­میـییب­لر.

اوروشلریندن کئچن یئرلر ماه­نیشان، مییانا، چاراویماق، سراسکند، اوجان دیلار. بارماق سایی دا کند یول قیراغیندا گؤرمک اولور. بو کندلره یاخشی اولا بیلردی، آنجاق ائولرین چوخو بوشالدیریلیب. اولا بیلسین بوشالتمیش­لارا خبر چاتسین، کندیزه بویوک یول چکیب­لر قاییدین. بلکه قاییت­سین­لار. بلکه ده قاییت­مادیلار. آخی اولا بیلسین چوخلاری شهرلی­له­شیب، سوی آدلارین دَییشیب، دریلرین قارالدیب، شاسی­لارین  بوزوب، یئریشلرین والایلادیب، دیللرین ده کسدیریب­لر. دئییرم بیر بئله دوشونمک منه قالمیـییب، یولومو گئده بیلسم بویوک ایش گؤرموشم. بویوک یولون دیمدی­یی شیبلی یه یئتیش­مه­میش بیردن اییلیر. دوشورسن کوهنه یولا. کؤهنه یولو دا گئنلدیب­لر، گئنلدیک ده ماشینلار داها دایانمیرلار. قور­گؤلو ده یولدا گؤرمک اولور، من هر زامان قورو گؤلو دولو گؤرموشم نییه دئییرلر قوری گؤل بیلمیرم. آللاه هئچ گؤلو قوروتماسین. شیبلی­نی آشدیق­دا اوزو آشاغی تبریزه یوللانیرسان ائله سورعت آلیرسان کی دایانیلماز. پولیسین قورخوسو اولماسا ائله سوروب ساعات قاباغیندا دایانارسان. ساعات قاباغیندا بوتون ساعاتلار دایانیب­لار. تبریزه گیرمه­میش­دن اهر، کلیبره بیر یول آیریلیر گئدیر. قالالارین سرگیسینه او یولون سونوندا یئتشمک اولار. آیریجی سووشدوروب دوز گلدیک­ده قونقا باشینا چاتماق اولار. تبریزه 3 یولو ایله گیرمک اولور؛ یوخاری کمربندی، آشاغی کمربندی، شهر ایچی. هر یولو گئتدیکده بیر گؤزللیک­لری گؤره بیلرسن. یولون سونو تبریز اولورسا یوللارین بیریندن گیریب تبریزین درینلیـیینده باتارسان. اورمویا گئتدیکده شاه گؤلونو گؤزلرینده گؤللندیررکن، وادی رحمته یئتیریب سهندین اته­یینده یاتان­لاری خاطیرلاییب، بورولوب گئدرسن. خویا مرنده گئتدیکده یوخاری کمربندی ایله قیرمیزی داغلارین قوینونا گیریب بیر قوجاق قیرمیزی تورپاق بایراملیق آپارا بیلرسن. آنجاق شهر ایچیندن ده سوزوب چای قیراغیندان آخا-آخا بورولوب گئده بیلرسن. سامان مئیدانیندان نئچه یوزایللیک سوورولموش سامنلارداندا ساری دون بزه­نیب امره قیزا گیریب شهریاردان سهندیه­نین اوخوماغین ایستییه بیلرسن. سیزا-سیزا آجی چایا چاتارسان. اورتا یولو سئچیب، تبریزین اورتاسیندان، کئچیب، یئکه توکان­لاردان آذربایجان مئیدانینا ساری یوللانیب، هاوا آلانین اؤنوندن آخیب یاما دوغرو یوللاندق. تبریزده دایانماق ایسته­سم ده دایانا بیلمه­دیم، دئدیم کئچه­-کئچه بوتون تورپاق­دا یاتانلارین یادلارینی یادلادیم. تبریزه بورجوم قالدی بیرده گلیب دولانمالی­ایدیم، ایندیلیک یوللاندیم تبریزدن. سوفیانا یئتیشدیکده آذربایجان گونشینده یازیلمیش یازینی خاطیرلیرام، سوفیانی لاتین جه یازدیق­دا هر تابلودا بیر جور یازیب­لار. یامین چمی سوفیانا دک چکیلیب، یاما گئتدیکجه دومان چوخالیر، هاوانی سویوغو دا آرتیر.

ائله بیل یئر گؤی قاش­-قاباق ساللییبلار بیربیرینه. مرندین قیراغیندان سووشاراق "کوشک­سارای" بیزی قوناق چاغیریر. یاواش-یاواش یورقونلوق آرتیر، یولدا ماشین­لارین سایی دا آرتیب یول دارالیر. قاباقدان گلن ماشینلار دا سنه ایشیق وئریرلر. خوی مرند آراسی دوزلیک بیر یئردی یاریسی اکین یئری، یاریسی کؤده یئر. قاپیلیغا یئتیردیکده تکجه بو کندی ایله دوه­لرین گؤرمک اولور. گؤز ایشله دیک­جه کؤده یئر اوزاق­لاردا داغلار، هر دن ده بیر ایکی آغاج، قمیش­لیک ده گؤرمک اولور. ائله بیل آغاجلار کیچیلیب­لر. بلکه ده کیچیلدیریلیب­لر. هاوانین سویوغو داها دا آرتیر. ائواوغلو گدیینه یئتیشیریک بوردا یولا ایکی یولا آیریلیر؛ دوز یول ماکی، قره زییادینا بورولان یول خویا. خویا زویوشورم، یامین چمی خویا جان بیزی ایله سورونوب گلیب. خویا یئتیشدیک­ده گونو گؤره بیلسک اورتایا یاخین­لاشمالیدی. دئیه­سن گلدیک چاتدیق. گؤرک نه اولور.  

بایرام

بایرام

     بایرام گلیر چاتیر، هر ایل ده تیکرارلانیر. آذربایجانلان باشلانالاراق، دونیانین چوخ یئرلرینده بایرام یایقین دیر. هر یئرین یئرلی آدام­لارینا اویغون بایرام دب­لرینی گؤرمک اولور. بیر سیرا یئرلرده بو دب­لر آغیر اولور، باشقالاریندا بیر آز یوموشاق. اینسان­لار بیر آز اؤزلرین آیدین فیکیر حیس ائتدیکده بو دب­لر کئچمیشینکیدیلر دئیره­ک اؤزلرینی مودرن گؤرستمک اوچون، بوتون بایراما عایید دب­لری اؤزلرینده سیلدیرمه­یه چالیشیرلار. بایرام دب­لرینی وورغولادیق­دا تکجه او دب­لری یورورلار، چوخ بویوک آتدیم آتدیق­دا بیر یازی یازیرلار، بیر رسیم چکیرلر اینانا بیلمدیک­لری بیر اولایی نه جور یوروب، ناخیش­لییرلار آللاه بیلیر. البت یازی یازیب ناخیش چکن لر چوخ دا یاخشی ایش گؤرولر، آنجاق بو دیر­لری اؤزلری یاشایا بیلسه­لر یازیلاری، ناخیش­لاری آرتیق­راق جانا یاتار.

 وورغولامالییام، بیر دب یاشاماسا، زامان سوره­سینده آرادان پوزولوب، تکجه خاطیره­سی قالار، سونرا بیرلری ده تاپیلیب اونلاری یئنی­دن قورماق ایسته­یه­نده بو ایسته­مک یاراماز، یارادیق­دا انه­شوش یارار، هر نه­ ترسه یئرینه اوتوروب، یئنی­دن قوران چالیشار بئنین­ده اولانی دب یئرینه، میللته وئرسین. گؤره­ک وئردییی  نه چیخیار؟ یئرین آلار، خالقا ایشلر، خالق ایشله­در؟ نئچه ایل یاشار؟!

البت یاراییب، یارامادیغینی من قرار وئره بیلمرم، آنجاق یاشادیغیمیز ایللرین تجروبه­سی بونون ترسینی گؤستریر، دئمک اولار یاشایان هر بیر اثر خالقین یارارلاندیغی اولایلارین آخینین­دا اولسا او یئرینه اوتورار.

 هاچاندان یارانماغی بیلینمه­ینله نئچه مین ایللردن قالان دبلرین و کیمین یاراتدیغی بللی اولمایان دب­لری آچیق­لاماق بو آسان­لیق­لا اولماز. میللتلرین اوزون زامانلاردا اولوشدوتدوق­لاری دب­لر، زامان سوره­سینده تاپدالانیب، یونتولوب چوخلو دونلار دییشیب، آشامالاری آشدیریب بیزه گلیب چاتیب. بو دب­لرده دین، افسانه، اوسطوره، عئلم، خورافه و .... یاشاییر. دب­لرین هانسی یئری هانسی دونو گئیدیـیینی بیلمک داها چتین دیر. بیر سیرا دب­لرین ده ندنین بیلمه­دیـییمیزده اونو سیلیب قیراغا قویماق بویوک یانلیش­لیق دیر. لئوی ایشتیراوسین گونئی آمریکانین یئرلی خالق­لارینین آراسیندا  آپاردیغی آراشدیرمالاردا، کئچمیش­دن قالان یاشام طرزلرینده اوسطوره­ای دوشونجه یاشادیغینی وورغولویور. بوگون بوردا اولان بیلگی­لر اونو چؤزه بیلمه­دیک­لری اوچون اونلاری گئری قالمیش دوشونجه آدلاندیریرلار. بئله آدلاندیرماغین تکجه ندنی بیر یؤنلو باخیش­لار دیر.

بایرام­دان اوزاق دوشمویه­لیم، یئر دولانیر، گونه یاخین­لاشیب، یئر قیزیر لوتلنیر، هر نه وار ایچینده ائشیگه توکوب، بیر شئی قالمادیق­دا سوزالیر، سارالیر گوندن اوزاقلاشیر، لوتله­شدیگینه گؤره آغ دون گئییر،  یئر دونور، بیر داها گونه یاخینلاشماق ایسته­دیکده بایرام اولور. دئمک تام دوغایا(طبیعته) باغلی بیر اولای دیر. قیش بوتون قیش­لیغی­لا باشا چاتدیق­دا یئرین جانلانماسینین خبری، بایراما بیر آی قالمیش­دان یئر گؤیو بورویور. بو اولایی قوتلاماق، بئله بیر دورومو یاشایان یئرلرده یاشانار، یاشامادیق­دا دوشونوب یاشادا بیلمز.

اودون دیرینی سویوق­دا یاشایان اینسانلار بیلر. کئچمیش زامانلار  اوجاق­لارینین سؤندویونده یئنیدن اودو یاندیرماق چتین اولار، بو چتینلیک قیشدا ایکی قات آرتار، بلکه ده اونلارین حایاتلارینین سونونا آپاراردی. ائله اونا گؤره­ ده اوجاق قوتسال بیر آنلام تاپیر. ­

زومارین سونا چاتدیغی­لا باغلی، قیشین قارقیشیندان قورتولوب بیر ایل داها یاشاماق ایمکانی تاپان اینسانلار تکجه بایرام آدینی بئله بیر اولایا وئره بیلرلر.  

بایرامی دوشوندوکده هر نه­ یئنی­دن دوغولور، یئنی­دن باشلانیر. هر نه­یی یئنی­دن باشلاماغا نئینه­مه­لیـییک، بو سئوینجی بوتون اینسانلارلا پایلاشمالیـییق، قاریلا قیش آرامیزا آرا سالدیغی اینسانلاری ایزلی­ییب تاپمالی­ییق. دیری قالدیقلارینا سئوینیب، اؤلن­لری خاطیرلاییب، حایاتی اولدوغو کیمی یاشامالی­ییق. بایرام اؤزو هر نه­یی چاتدیریر. هر بیر باشقا اولایین عزیزله­مه­سینین باشقا آدی اولمالیدی. قویروق دوغور، سونای اولور، هالای وورلور هالای پوزان اویانیر، گونوز دارالیر، گئجه اوزانیب، چیلله­سینه چاتیر. کوسالار یولا دوشور، کیچیک چیلله گلیر، بایرام یئلی اسیر(وعده یئلی)، سون چرشنبه­لر سووشدورولور، آخیر چرشنبه کئچیر بایرام گلیر، ایل دؤنور. بایرام سوفرالاری آچیلیر. برکتلردن یئددیسی سوفرالارا قویولور. هر کس تاپا بیلدیگی قدر برکتلره عایید سوفرالاری بزَییر.  

برکتلرین یئددیسی بونلاردان عیبارت اولور: 

1-    تورپاق برکتی: قووورقا، بوغدا، تورپاق

2-    سو برکتی: بالیق، سو

3-    آغاج برکتی: آلما، ایده، گیردکان...

4-    معنوی گؤی برکتی: قوران

5-    آل­-وئر برکتی: پول، سیککه

6-     حئیوان برکتی: یومورتا

7-    گؤیرمه­یین برکتی: گؤی بئجرتمک

ایسلام گلمه­میش­دن اؤنجه بایرام تکجه ائله بایراما دئییلیردی. آنجاق ایسلام گلدیکدن سونرا داها ایکی اولایا بایرام آدی وئریلیر: قوربان بایرامی، فیطیر بایرامی. بو ایکی بایرامدا دا یئنی­لمک اولور. معنوی یئنی­لنمک. ایچریدن پیس­لیک­لری آریتلاماق بایرامی. بایرام تک دئییلدیگینده بیلینیر ایل بایرامی دیر، قوربان بایرامی­لا فیطیر بایرامی. قوم قدیر ده سئییدلرین بایرامی آدلانیر. کئچمیش­دن قالان دب­لر دین گلدیکده آرادان گئتمی­ییب تزه دون گئییر. دینیله اویغون­لاشیر.

سونوندا آرتیرمالییام برکتلردن یئددیسی ناصر منظوری­نین دیلماج­دا چاپ اولدوغو آیین دوشونجه مطلبیندن آلینیب.

بایرامیز موبارک اولسون.

یومورتالاری قیرمیزی بویایین، قیرمیزی بالیق­دا یاددان چیخماسین، قوورقانی دا تؤو وئرین، ایده، قیرمیزی آلما، گؤیرتمیش گؤیون قیرمیزی قورشاغی دا یاددان چیخماسین. الیزه خینا دا قویون قیرمیزیسی بویانمیش یومورتایا چالیر. 

بیزیم بایراملیغیمیز

" بیزیم بایراملیغیمیز یادینیزدان چیخماسین" بو گونلر هر یئرده لاپ چوخ ایشلنیلن سؤزلردن دیر. بایرام قاباغی هر یئره گیریسن ائله بو سؤزو ائشیدیرسن. هر دن قاپیلار دا دویولوب بایراملیق ایسته نیلیر.  بیزیم اوچون آزی اون دفه فرقلی یئرلرده بایراملیق وئرمه قولاغیمیزا ایشلییر. یاواش یاواش آدام ماراق لانیر هر کیمی گؤرور بایراملیق وئرسین. لاپ دوزون سوروشسان ائله ایندی بایرام اولمامیش دان بایراملیق ایسته سلر، یوخ ائشیتمزلر. یئنی ایله کئچدیـییمیزده بایراملیق وئره بیله جه یم یا یوخ بیلمیرم.  

   بایراملیق وئرمه هاواسی یامان باشیمدا فیرلانیر، قاباغیما هر کیم چیخیر بایراملیغی وورغولویور. دئییرم آمما نه یاخشی دویغو دیر بایراملیق وئرمک، باشقا یاشاماقدی دئمک. کاش آدامین الی آچیق اولاردی اؤلکه ده کیم وار  بایراملیق وئرردی. اؤز-اؤزومه دوشونورم آذربایجانلی لارا بیر بایراملیق وئرم نه یی وئره بیلرم، سونرا دوشونورم " آی بالا من دولت باشچیسی دئییلم کی هامییا بایراملیق وئرم. آمما اولسایدیم نئجه؟! بیرینجی بایراملیغیم نه اولا بیلردی! 

 واللاه نه وئره بیلرسن بیر بئله آدامی سئویندیره بیله سن. دامازلیقدان بیر دامجی دامیلسا، هر کس سئوینر، بیر قورتوم اؤیرتیم، انا دیلینده.  

سیز نه دوشونورسوز. بیر باخین گؤرک کیم وئره بیله جک بئله بایراملیق سیزه.  

آی بالا بیر بئله بایراملیق من وئردیم. منیم بایراملیغیم دا یاددان چیخماسین.  

گؤروم دا سیزی 

چرشمبه

ایلی آددیملییا-آددیملییا سونا چاتدیریریق.  

بایرام آیینین ایچینده ییک. دؤرد چرشمبه نین ایکی سین آتلییب اوچونجوسونه یاخینلاشیریق. بایرام یئلی ایسه هردن اسیر. بو ایل قیش دئدییین بیر شئی گؤرمه دیک. چیلله لردن خبر اولمادی. سویوقدان دا .  

قیشیمیز بئله اولدوق دا یاییمیز نئجه اولاجاق، آلاه بیلر. بو ایلین ده سون چرشمبه سینی تئهراندا قالماق مجبورییتینده اولاجاغام. نئچه ایللردی داها شال ساللییانمیرام. شال ساللییاجاغیم بوتون باجالار منی گؤزلویورلر. قورخورام گؤزلویوب گؤزلرینه آغ گله. بیر ایل، ایکی ایل، دورد ایل، توت گئت ایللر بویو گؤزله مه لیدیرلر.  گوناه او باجالارین اؤزلرینده یدیلر. سئویتدیرنلرینی کوسدورمه مه لیدیرلر. بو کوسمک ائله کوسمک دی کی باریشماق ایسته ینده ده باریش اولمور.   

اؤزومله دئییرم باریشیم! بورالاردا چوخ قارچیچه یی آختاردیم تاپا بیلمه دیم. نوروز گولونو ده تاپانمادیم. اوت یاندیراجاغیم یئری ده.   

برکتلردن یئددیسنی نئینیرم، بایرام سوفراسی آچاجاغام کی توپلویوب اورا قویام! 

آمما روز یومورتا بویویاجاغام، کند یومورتاسینی هاردان تاپیم! روزو بویویاجاغام اؤزو ده قیرمیزی. بیلیرسیز! قیرمیزی موبارک اولار موبارک.

دئمه دیز یومورتالاری نئنی سن؟ اؤزوم دئییرم آیریسیندان ائشیتمییه سیز. گلیب ترسه خبر وئررلر. بویانمیش یومورتالاری اؤزومدن گؤتوره جه یم یولدا بوتون دادیب دوشوب دویوشه جه یم.  

 بوتون یومورتالار یئنیلمه لیدیرلر. کوسدورولموش قاییدیر.

بالیغی دا ساخلییاجاغم کوسولسم  یولدان کئچن چایلاردان توتام.   

کیم نه بیلیر بو کوسمک نه قدر سوره جک. سیز دئیین.  

بیلیرسیز بختیم ده یوخدور تونقاللاردان آتلانام. جورابیمی دا توخویوبلار.  

یوخ توخومویوبلار. بوردا یون یوماق تاپیلمیر. تاپیلسادا اییریب، توخویان تاپیلمیر.

آنا دیلیمیزه یان دورمالیـییق

دونیالیق آنا دیلی گونو قوتلو اولسون.