ظولومات

بوغازلاری توز باسسا دا، آغیزلار اؤرتولمدن قاپانمادان، سولانا سولانا سولارین تؤکتسه ده، دیللری قورومادان چاتلامادان، دوداقلارین یاشلاری بیتیب چاتلاییب پاتلاسالار دا، داماغین رنگی دؤنوب قارایا چالسادا، دیشلرده دیشلی لیک بیتندن سونرا دا بئله، گؤزلرین سولاریندان زینه آخیردیب گؤزلرین سولاری قورتولوب، گؤزلری دونیانی قارا گؤردویونه باخمایاراق، بئنینین سولاریندان دیل دوداغا آخیردیغیلا بئنین ده سولارینی کؤکو قورویوب، اورکدن اولان بوتون سئوگی، قانی بوشالیب، حایاتدان ال اؤزمه یه نه تک دونیادا سئوگی نین نئجه اولدوغونو دوز دوشوندویونه باخمایاراق، ابدی بیر ظولوماتا گیردیینی گؤره گؤره هر نه یی یوخو ساندیغینی، یوخودان اویاندیغی کیمی، ایشیق لیغا چیخدیغینی ایناناراق، ایشیق گؤزلرینی قاماشدیرماسین دئیه قارا داشدان دوزلمیش گؤزلویو گؤزلرینده یئرلشدیریب، یوخونون اویانماق واقتی اولمادیغینا باخمایاراق بئله یوخونو داها چوخ دادماق ایسته ییردی.

دلی سی

-الو بویورون 

- سالام جانیم  

- سالام خانیم من سیزین هاچان جانیز اولدوم؟ هاچاندان بئله موحبتلی اولوبسوز؟

- او نه سؤزدو؟! سن اوللدن ائله منیم جانیم اولوبسان، دوغولاندا منیم جانیم اولماق اوچون دوغولوبسان. من دونیایا گلنده، یانی هله گلمه میشدیم سنی رویالاریمدا گؤروردوم. 

- خانیم ائله بیل سیز دوغرودان قاتیب سیز. ائله دانیشیرسیز گؤرن دئییر سندن من نئچه ایللردی بیرگه یاشامیشیق، ارلی آروادلار کیمی داورانیرسان. یاواشلات گؤرک سیز هله نه ایستی ییرسیز. نه تئز بئله خالا اؤلوبسوز. بیر ده من دئدیم بلکه ایشینیز وار مندن بئله تئزدن زنگ آچیبسیز.  

- ووی به منیم جانیم نییه بئله؟ من سنه جان دئمه ییم نه دئییم! تکجه سیزه یاراشان سؤز منیم جانیم اولماقدیر. من جانیم یاخشی تانییرام، جانیمدان باشقا بیر سؤزله سنی چاغیرانمارام. گؤیه گئدسن یئره گلسن بیرجه بو دونیا سنله منه جان وار او دا من سنین جانین، سن ایسه منیم جانیم اولماقدیر. قاچاق یولوموز یوخدور جانیمین جانی. 

- یاواش باجی، بیر آز یاواش او قدر جان جان دئدینیز، جندک ایییسی بورالاری قوخولدوب، نئچه لیتر عطیر ایسته ییر بو جندک قوخوسونو بوردان قازدیرا، باغیشلا خانیم من بئله ادبسیز دانیشیرام. توبورجه ییی بوغازیودا اوتسان بیر آز دینجله بیلرسن، گؤزلریوی بیر دامجی یوم بلکه بئینین آراملاشا. بیر ده سن دئیین سؤزلری بیری ائشیتسه ایکیمیزه ده یاخشی اولماز، یان یؤوره ده اولان قالان اعتیباریمیزدا الدن گئدر. من سیزه حؤرمتیم وار آنجاق بو حؤرمت او زامانا کیمین دی کی منیم آیاغیما دولاشمییاسان، دولاشیبسان حؤرمت سینیب هر نه آرامیزدا وار آرادان پوزولوب گئدر. من فیکر ائله میرم سیزینن ائله داورانمیش اولام کی سیزده بو حیس یاراناکی من سیزین جانیزام. 

- جانننننننننیییم، نییه باش-باشا قویورسان، سن منیم جانیم اولماسان کیمین جانی اولا بیلرسن آخخخخخخییییی! من سنه جان اولماسام کیم سنه جان اولاجاق. 

- باغیشلایین خانیم منیم ایشیم وار، ایش یئرینده اوزومه سؤز گلر، تیلفونو بوندان آرتیق مشغول ساخلایا بیلمرم، سیز ده گئدین مورخصی آلین ائوینیزه گئدین اوزانین، دینجلین. ائله بیل ایشین چوخلوغو سیزی یوروب. باغیشلایین تلفونو، سیزین جاوابینیزی آلمادان کسیرم.  

اوغلان تئلفونون دسته یینی یئرینه قویدو.  

اوغلان اؤز-اؤزونه دوشونوردو زامانا نئجه خاراب اولوب، ایندی کی قیزلاردا حیا آثاری  دئیه بیر شی یوخدو، ایسته دیکلرینی گؤرورلر. بیر زامان قیزلارین آروادلارین حوجب حایالاری وارایدی، ایندی حوجب حایادان سؤز صؤحبت ده قالماییب ، چوخدا بو سؤزلردن دانیشاندا آدامی دالی یا قالمیش سانیرلار، سانماقلاری جهنم دیبی بودور دانیشمازکی هئچ سؤزون آچماز بونلار آدامی اینجیتمیر، بیردن بو سؤزلر آدامین اؤز آیاغین توتاندا لاپ تب-درجه دن چیخماق واجیب اولور کی هئچ، سی سی یو دا یاتماق دا گرکلی اولور. یا گرک دوستاقدا یاتاسان یا دا سی سی یو دا. قدیم قیزلارین اؤرکلرینده سؤزلری اولسایدی دا آغیزلارینا گتیرمزدیلر، گتیربن آبیرلاری سو یئرینه جالانیب تؤکولوب آخاردی، آخاربن چایا سئله چؤنوب هر یئره سیچرایاردی، قیز ائله اؤنون سئلینده بوغولاردی.  

اوغلان یان-یؤوره سینه گؤز دولاندیریردی، جیغالا تاپیب، اونو آلیشدیریب دریندن سومورا، بورنوندان توستونو بوغلارینین آراسیندان ائشییه اؤتوروب آردیندان ایکی دنه سینه دن اؤسگوره، بوغازیندا اولان خیلتلاری سسینن یئره توپوره. 

هر یانا گؤز دولاندیردی، جیغالا تاپا بیلمه دی، گؤره سن به بو جیغالالاری هارا قویوب، کیشی نین جیغالاسی اولماسا نئجه اونا کیشی دئمک اولار، قدیمدن دئییب لر، کیشینین قره پولو جیبیندن،  جیغالا قوخوسو اؤستوندن اسگیک اولماز. اللرینی اوزاتدی بوغلارینی بیر تومارلییا، الی بوشا گئتدی. "نئجه یانی به بو بوغلارا نه اولوب" اؤزونو آینادا گؤردوکده، اللری تیتره مه یه دوشدو. قیزینان اوغلانین فرقین گؤره بیلمیردی، کیم بو اویونو اوغلانین باشینا گتیرمیشدی، بیلمیردی. ایندی نئجه ائوه گئده بیلردی، گرک دایاناردی هریئر قارانلیقلاشاندان سونرا ائولرینه گئدردی، قیرخ گئجه گونونز ده ائوده قالسایدی، اوزونون توکلری آنجاق ائینی یه بیلردیلر. بورگلنمیش  اللرین آلتیندا گیزلنمیش دوداقلارینان دانیشا بیلمیردی، ائله دوشونوردو؛ بیر بئله اؤزده دئییشیکلیک اینسانی زامان سوره سینده ایچریدن ده دئییشدیره بیلر کی هئچ سسینده ده ایز قویا بیلر. گؤره سن هاچاندان بئله بیر گونه دوشموش دور یادینا گلمیردی. 

یاناق لاری قیرمیزی ساریشین

     دیشلری بیربیرینه سورتولدو، چوخدان ایدی آغزی اونا سولانمیش ایدی. او ساریشین، یاناقلاری قیرمیزی هر بیر گؤروشچوسونو یولدان ائله یه بیلردی. هر زامان گولونج اؤزله کیمسه لری قارشیلاییردی، فرق ائله میردی کیم اولسون، آللاها گؤره گؤزل چیرکین ده ائله میردی. بلکه هر کیم اونو اله گتیرمه یی دوشونه بیلردی. او یاناغی قیرمیزی، بوتون دیشلری اؤزونه قیجیتدیتدیرمیش ایدی.  

   یولدان کئچن ائلچی اولا بیلردی، ایندی یه دک نییه بیری صاحاب دورمامیش ایدی اؤزو سؤزلو ایدی. بلکه ده بیری ایندی یه دک اونو گؤره بیلمه میش ایدی. بلکه ده چوخلاری اونا تاماح ساللاسای دیلار دا اله گتیره بیلمه دیک لری اوچون فیکیرلری گئجه گونوز ده اونون یانیندا اولسای دیلار دا قاباغا گئتمیردیلر. بئله بیر مالی اؤزونه بوراخماز اولماز ایدی بئله. بوتون گؤرنلری وورولا بیلردیلر. وورولانلارین اللری چاتسایدی، یول تاپا بیلسه یدیلر بیر آن دا دؤزمزدیلر.  اؤزونه باخیردی آز قالیردی اوتانسین، داها دؤغروسو اوتانیردی. اوتانماغینا باخمایاراق آیاقلاری دوردوغو یئرده قوروموشدولار. گؤزلری بتر بو ساریشینی توتموشدو ال چکه بیلمیردی.  بیلیردی ایندی چوخ اوردا دورسایدی گلیب گئدنی اؤزونه گولدوره بیله جه یدی. گؤزلری گؤزللیکدن ال چکه بیلمیردی. 

  اؤزونو بیر آز ییغیشدیرا بیلسه یدی یاخشی اولاردی، باخیشلاری خومارلانمیش ایدی، اوزاقدان گؤرن اونون اؤز حالیندا اؤلدوغونو دا بیلردی. ناهارین قیزغین چاغیندا بو خلوت یولاق دا ایکی دووارلار آز قالیر بیربیرینه یئتیرسین، آغاجلار دا باش-باشا دیمدیک-دیمدی یه کؤلگه لرینی یولاغا سرمیش ایدیلر.  سرین بئرده، قیزغین گونلرین قیزغین چاغیندا بیر بالاجا سرین سولی چایا آیاقلاری ساللاماق، آخار سویی بارماقلایا-بارماقلایا تاماح ساللانمیش گؤزلی سئیر ائتمکدن دادلی آن نه اولا بیلر دیکی اونو بوش-بوشونا الدن وئریدی. یان-یؤوره ده کی لرین سؤزلرینه نه قدر قولاق وئرمه سه ایدی  بیر او قدر یاخشی ایدی. بیرجه آزاد اؤزونو سئودیی یئرده یئره سره بیلردی نییه سرمی یردی. آخار سو ایله آغاجلارین قول-بوتالاریندان یارانان کؤلگه بیر ده سوواخ دووارلارین آخار سویون دامجیلاریلا ایسلانماغی گونون ایستی سینین قاباغینی آلماقلا اورانی سرین بیر کئچیده چئویرمیشدیلر. گونون جیزلاماسیندا بئله بیر سرین کئچیدده، یاناقلاری قیرمیزی ساریشینین دا اوزه گولمه سی دالیسی نه اولاجاغینا باخمایاراق اینسانی ائله یئره ساپلاندیریردی کی اوردان قوپارتماغا اوندان آرتیق چکیجی لیک ایستی ییردی که هلم-هلم تاپیلا بیلمزدی.

نی یه یازانمیرام

الیم یولا دوشسه ده، یازیلاریمی بیتیره بیلمیره م. بیملمیره م نی یه، البت یازیلار اوزانلادیق دا دالیسین ییغیشدرماق اولمور. بلکه ده فیکریمی بیر یئره ییغا بیلمیرم. هر قونو ذهنه گلدیک ده باشلانیر. پیس یاخشی باشلاماق اولور آنجاق بیتمه یی قالیر آللاه اومودونا.  

بلکه ده بیر زامان بیتسین لر بوتون یازیب باشا چاتدیرمادیق لاریم. آنجاق بوگوندن بئله یازاجایام بیتر بیتسین بیتمز من بیلرم بیر ده بیتمی ین یازیلار! 

سیز منی یولا سالا بیلرسیز سالین؟!! 

گؤزلویورم 

بوتونلوکله یاشامالی سینیز.

شام اوستو

         یاواش یاواش هاوانین ایشیقی آزالماقدایدی، هاوانین ایستی لییندنده آزالمیشدی، ائودن ائشییه چیخماق ایمکانینی هاوادان آلماق اولوردو. همه شه کی کیمین قاپی یا چیخدیقدا یولو بللی بیر یولو دور، سون آیلاردا ایستر ایسته مز  یولو تکجه بیر یولاقدان عیبارتی دیر.  آددیم لادیغی یوللار اونو تانییردیلار. ترسینه او دا اونلاری دریندن تانییردی. بو یولاغین هر بیر قاریشی اونون اوچون بیر قوجاق سؤز ایدی. یوللار اون لا، او دا یوللاری لا، یولداش اولموشدور. یوللاردا اولان بوتون دام دووار، قاپ باجا دا اونونلا دانیشیردیلار. بلکه ده اونا سؤز چاتدیریردیلار.

         دام دوواردا یاشایان اینسانلاری او داها دوغرو سو چوخ گؤرموردو، بلکه ده گؤرمک ایسته میردی. او تکجه بیر کیمسه نی گؤرمک  ایسته ییردی. اودا سئودییی  قیز ایدی. قیز دئدیکده بلکه ده قیز دئییلدی آنجاق اونون نظریجه قیز اولمالیدی نییه کی اونا بیر آیری باخیشلا باخیردی. تکجه بو قیزین باخیشی اونا بو حیسسی وئره بیلردی، بلکه ده یازیق اؤز اؤزونه دویغولانیردی.

          ائلوار اوردان اؤتدوکده او قادین، قاپی نی ایکی تایین بیر بیرینه یاخین لاشدیریب، قاپی نین زولاغیندان بیر گؤزلو اونو سئیر ائدیردی، ائلوار او قاپی نین اؤنوندن گئچدیکده آغیر باخیش لاری اؤز اوستونده حیس ائدیردی،  حیس سه دالدیغیندان  آددیملاری آغیرلاشیردی، ائله بیل آیاقلارینا داش باغلییب سان. ائلوارین اؤره ک دؤیونتوسو ده چوخالیردی. اؤ زامان اؤنون باشدان آیاغا تر باسیردی. بئله کی اوردان کئچه ندن سونرا اونون هر یئری جوم جولاق سو اولوردو، گؤزلری ده قاباغی گؤرموردو، قارالیردی، آیاقلاری دولاشیردی، یول اوستونده اولان بیر داشا آیاغی ایلیشیب، اوز اوسته یئره دوشوردو، اوزونون یئره ده یمه سینین قارشی سینی آلماق اوچون، اللرینی تئز یئره آتیردی، اللرینین کفی، بارماقلاری، بویرو، اللری یئره سورتولدوکده دریسینی الدن وئریردی، آجیشیردی.

      سئودی یی قیزین اونون ییخیلماسینا گؤلمه یی، اونو هر ندن چوخ آجیشدیردی. البت بونا آجیشماق یوخ، نئجه دئیه رلر بیر تحر پوزولماق دئمک اولار. بیر یاندان سئوینج، سئودیی قیزین گؤیلونو بیر تحر اؤزونه چکمک، باشقا یاندان اؤزونون ال آیاقسیزلیغی. قیزین ‌ سسیزجه گولمه یی لاپ دلیلندیریردی، یارین گولمه سی جانلاندیرار آنجاق سسین ائشیتمه یه نده آدامی دلی ائده ر. آخی دوغروسو بیله بیلمیردی گولور یوخسا حئییف سه نیر، بلکه ده او فیکر ائلیر بو اوغلان توپال دیر.

       هر یول قاپی قاباغیندان  کئچنده ییخیلماقدان گؤزلوردو آنجاق آیاقلاری دولاشیردی اوز اوسته یئره دوشوردو.  اللرینده دیرلیک قالمامیشدی، اوز گؤزونه هله بیر شی اولمامیش دی. اللری ائله گؤینویوردو دای یئره آتماق دان چکینیردی. اللرین ده آتماسا اؤز گؤزو ائله اولمالی ایدی. نئچه ساعاتلار  چالا جوگگه ده، داغ دره ده، داشلیقدا، چای دا یئرییردی بئله بیر دفه ده یئره دیمیردی. آخی بو ایشین ندنلی یی هاردان دیر!

ایندی یه تک بئله گیره دوشمه میشدی، اؤزونون ایتیرمه یینین ندن لیین بیله بیلمیردی، بو دویغو سئودا دویغوسو اولمالی ایدی. اؤ دوغروسو بیلمیردی بوردا بیری سی وار یوخسا رویالاردا گزیر.

       بئله بیر گونه دوشمه میشدن اؤزونه چوخ گووه نه ردیر. ایندی نئجه! اؤزونو چوخ یازیق گؤروردو. باجاریق دان دوشموشدور. بئله گونه دوشمه یین هئچ اینانماز دیر. یاواش یاواش ائولرینده ده اولان   تحککومو سینیردی.

بیرینجی بولومون سونو